Búgin Astanada Qazaqstan Respýblıkasy Jeńil atletıka federasıasynyń Kezekten tys konferensıasynda federasıanyń jańa prezıdenti bolyp Ahmetov Danıal Kenjetaıuly saılandy, – dep habarlaıdy Qamshy.kz aqparat agenttigi QR Jeńil atletıka federasıasynyń baspasóz qyzmetine silteme jasap.
Elordamyzdyń «Hilton» qonaqúıinde ótken kezekten tys konferensıanyń kún tártibinde eki másele qarastyryldy:
1. QR Jeńil atletıka federasıasyn buǵan deıin basqarǵan Jaqsybekov Ádilbek Ryskeldiulynyń ókilettiligin merziminen buryn toqtatý;
2. QR Jeńil atletıka federasıasynyń jańa prezıdentin saılaý.
Osylaısha, Atqarý komıteti músheleriniń biraýyzdy sheshimimen Ádilbek Jaqsybekovtyń ókilettiligi merziminen buryn toqtatylyp, onyń ornyna QR Jeńil atletıka federasıasynyń prezıdenti bolyp Ahmetov Danıal Kenjetaıuly saılandy.
– Maǵan senim bildirgenderińizge rahmet! Ádilbek Ryskelduly basqarǵan bir jyldyń ishinde az sharýa atqarylǵan joq. Endi sol bastamalardy ary qaraı jalǵastyryp, Qazaqstan jeńil atletıka federasıasyn damytýǵa tyrysamyz. Aldymyzǵa qoıǵan maqsattarymyz óte kóp. Máselen, birinshi rette sporttyq ınfraqurylymdardy jetildirýdi kózdeımiz. Jaqyn ýaqytta jeńil atletıkaǵa beıimi bar barlyq óńirlerdiń ákimderimen kezdesip, sol aımaqtardyń jeńil atletıka sportyn damytý joldaryn qarastyramyz. Sonyń ishinde, kelesi jyly Semeı qalasynda Ulttyq quramalar bazasy daıyn bolady, - dedi Danıal Kenjetaıuly.
Sondaı-aq, Kezekten tys konferensıada QR Jeńil atletıka federasıasy Atqarý komıtetiniń jańa músheleri bekitilip, Ádilbek Jaqsybekov Atqarý komıtetiniń quramyna endi.
Ahmetov Danıal Kenjetaıuly 1954 jyly 15 maýsymda Pavlodar qalasynda dúnıege kelgen.
1976 jyly Pavlodar ındýstrıaldy ınstıtýtyn bitirgen. Mamandyǵy boıynsha ınjener-qurylysshy.
Ekonomıka ǵylymynyń doktory, Qazaqstan Respýblıkasy Mıneraldy resýrstar akademıasynyń akademıgi.
Eńbek joly:
1976-1981 jj. - «Pavlodar turǵynqurylys» tresinde master;
1981–1983 jj. - Ekibastuz qalalyq partıa komıtetinde nusqaýshy;
1983–1987 jj. - «Ekibastuzshahtaqurylys» kombınatynda bas ınjenerdiń orynbasary, partkom hatshysy;
1987–1991 jj. - Ekibastuz qalalyq atqarý komıteti tóraǵasynyń orynbasary;
1991-1992 jj. - «Ekibastuz energoturǵynóndirisqurylys» tresiniń basqarýshysy;
1992-1993 jj. - Ekibastuz qalalyq ákimshiliginiń basshysy;
1993-1997 jj. – Ákimshilik basshysy, Pavlodar oblysynyń ákimi;
12.1997-10.1999 jj. - Soltústik Qazaqstan oblysynyń ákimi;
10.1999-21.12.2000 jj. - Qazaqstan Respýblıkasy Premer-Mınıstriniń orynbasary;
21.12.2000-21.11.2001 jj. - Qazaqstan Respýblıkasy Premer-Mınıstriniń Birinshi orynbasar;
21.11.2001-13.06.2003 jj. - Pavlodar oblysynyń ákimi;
13.06.2003-08.01.2007 jj. - Qazaqstan Respýblıkasynyń Premer-Mınıstri;
10.01.2007-17.06.2009 jj. - Qazaqstan Respýblıkasynyń Qorǵanys mınıstri;
12.2010 jyldan – Ekologıalyq energetıka salasyndaǵy kompanıalyń basshysy;
2012-11.2014 jj. – Energetıka jáne ınfraqurylym mınıstri;
2014 jylǵy 11 qarashada Shyǵys Qazaqstan oblysynyń ákimi bolyp taǵaıyndaldy.
Marapattary:
«Barys» 2-i dáreje (2004), «Barys» 3-i dáreje (1999), «Qurmet belgisi» (1986); «Qazaqstan Respýblıkasynyń Tuńǵysh Prezıdenti - Elbasy Nursultan Nazarbaev» (2012) ordenderi jáne «Astanaǵa 10 jyl» atty mereıtoılyq medali (01.07.2008).
