QR bala quqyqtary jónindegi ýákili Zaǵıpa Bálıeva OQO-da zorlandy degen jeti jasar balanyń ájesi men apaıy balany qorǵaý úshin Astanaǵa óz erkimen barǵandaryn aıtty , - dep habarlaıdy Tengrinews.kz.
"Meniń mindetim - balanyń quqyǵyn qorǵap, ony qaýipsizdikpen qamtamasyz etý. Men ony ózim alyp kete salǵan joqpyn. Zańdy ókili - ájesi, apaıymen kezdestim. Olarǵa "Qazir Astanaǵa baryp, saraptama jasaýǵa qalaı qaraısyzdar? Sizderge barlyq jaǵdaıdy jasap beremin. Menimen birge barǵylaryńyz kelse, júrińizder. Bıletti satyp alyp beremin. Sizderdi eshkim mazalaımaıdy. Qaýipsiz jerde bolasyzdar" dedim. Óz mindetimdi atqardym", - dep túsindirdi Bálıeva.
Munyń aldynda Zaǵıpa Bálıeva zorlyq kórdi delingen jeti jasar balanyń anasy onymen baılanysqa shyqqanyn aıtyp, balanyń búgin anasymen kezdesetinin aıtqan bolatyn.
Sondaı-aq, osyǵan deıin QR bala quqyqtary jónindegi ýákili Zaǵıpa Bálıevanyń zorlyq kórdi delingen oqýshy balamen kezdeskeni habarlanǵan bolatyn. Bálıevanyń aıtýynsha, balanyń densaýlyǵy men quqyǵyn qorǵaý maqsatynda tergeýshi balaǵa eshkimniń de qandaı da bir suraq qoıa almaıtyn qaýly shyǵarǵan.
Eske salaıyq, Jelide OQO-nyń Saryaǵash aýdanyndaǵy Abaı aýylynda jeti jasar bala zorlandy degen aqparat taraǵan. Keıin TVK málimetinshe, OQO İİD ókilderi bul derekke qatysty QR Qylmystyq kodeksiniń 121-babynyń 4-bóligi ("Seksýaldyq sıpattaǵy zorlyq-zombylyq áreketteri") boıynsha qylmystyq is qozǵalǵanyn habarlaǵan. Alaıda kúdiktiler nemese ustalyp, qamalǵandar jaıly eshqandaı málimet túspedi. Artynsha bilim jáne ǵylym vıse-mınıstri Bıbigúl Asylova saraptama qorytyndysy oqýshy balanyń zorlanǵanyn rastaǵanyn habarlaǵan.
