Aýdan ákimdikteriniӊ saıttarynda kásipkerlerge qajetti ózekti aqparat joq. Bul týraly Taldyqorǵanda ótken Otandyq taýar óndirýshilerge qoldaý kórsetý sheӊberinde satyp alý salasyndaǵy jumys komısıasynyӊ kezekti otyrysynda aıtyldy.
Komısıa múshesi, Almaty oblysy Kásipkerler palatasy Kásipkerlerdiӊ quqyǵyn qorǵaý jáne sybaılas jemqorlyqqa qarsy is-qımyl keӊesiniӊ tóraǵasy Banıamın Faızýlın ulttyq ekonomıka mınıstriniӊ resmı ınternet-resýrsta suranys bar negizi qurylys materıaldary men quraldary týraly aqparatty jarıalaý týraly buıryǵyn aýdan ákimdikteri oryndamaıtynyn málimdedi.
«Jobalyq qujattamada qarastyrylǵan negizgi qurylys materıaldary, quraldary, ónimderi men qurastyrylymdarǵa suranys bekitilgen smetalyq tizimdemeni resmı ınternet-resýrsta jarıalaýdy qamtamasyz etý týraly ulttyq ekonomıka mınıstriniń 2015 jyldyń 19 naýryzyndaǵy buıryǵy bar. Buıryq úsh jyl buryn oryndalaýy kerek bolatyn, biraq oryndalmady. Qolymda bar Premer-Mınıstrdiń túsindirme jazbasy boıynsha Úkimet ortalyqtandyrylǵan satyp alý qyzmetin qurý arqyly jańa satyǵa shyǵýdy josparlap otyr. Al biz áli birinshi satydaǵy tapsyrmany oryndaı almadyq. Men bul suraqty oblys ákimdigine joldaımyn. Jalpy bul jumysty aýdan ákimdikteri júrgizýi tıis. Osynyń oryndalmaý sebebin bilgim keledi», - dedi Banıamın Faızýlın.
Komısıa tóraǵasy, Almaty oblysy Kásipkerler palatasynyń dırektory Narıman Ábilshaıyqov aýdan ákimdikteri men oblystyq qurylymdardyń barlyǵy birdeı memlekettik satyp alý týraly aqparatty jarıalaımaıtynyna nazar aýdartty. Mysaly, Eskeldi aýdany ákimdiginiń saıtynda satyp alý boıynsha ózekti málimetter 2017 jyldyń qarashasynda shyqqan.
«Kásipkerler palatasy qoǵamdyq monıtorıń formasynda posttenderlik baqylaý ótkizdi. Taldyqorǵan qalasyndaǵy 230 páterge arnalǵan 16 qabatty úsh turǵyn úıdiń qurylysynda paıdalanylatyn negizgi materıaldardyń jıyntyq tizimdemesin taldaý barysynda qurylysqa 100 jaıǵasym boıynsha taýarlardy paıdalaný josparlanǵan. Onyń ishinde 50 jaıǵasymda Qytaı men Reseı taýarlary. Sonda kórsetilgen qubyrlyq ónimder, jeldetýshi quraldar, alúmını qurastyrylymdar, tereze men esik bloktary Qazaqstanda da shyǵarylady», - dep atap ótti Palata basshysy Narıman Ábilshaıyqov.
Oblystyq kásipkerlik, ındýstrıaldy-ınnovasıalyq damý basqarmasynyń basshysy Álimjan Toqtasynov satyp alý salasynda jolnusqa bolatyn aımaq óndirýshileriniń biryńǵaı katalogyn ázirleý týraly usynys bildirdi.
Jumys komısıasynyń otyrysynda Eskeldi aýdany ákimdigi, energetıka jáne turǵyn úı komýnaldyq sharýashylyǵy basqarmasynyń otandyq taýar óndirýshilerdi satyp alý salasynda qoldaý máseleleri boıynsha jumys qorytyndysy tyńdaldy.
Eskeldi aýdany ákiminiń orynbasary Eldos Ahmetov ótken jyly 54 ashyq konkýrs bolyp, onyń ishinde 10-y ótkizilmeı, qaıta uıymdastyrylǵanyn aıtty.
Energetıka jáne turǵyn úı komýnaldyq sharýashylyǵy basqarmasyndaǵy zań, memlekettik-quqyqtyq bóliminiń basshysy Qanaǵat Moldabekovtyń aqparatynsha, satyp alýdaǵy jergilikti quram úlesi 68,7%-ti quraǵan. Onyń aıtýynsha, shyn máninde jergilikti quram úlesiniń kórsetkishi odan da joǵary.
«Taýar, qyzmet pen qyzmet túrlerin jetkizýshilerdiń kópshiligi formany qate nemese múldem toltyrmaıdy. Naqty jaǵdaıdy kórsetý úshin biz portalǵa engizilgen aqparattardy shyǵaryp alyp saraladyq. Qyzmet men qyzmet túrleri boıynsha aqparattar túzetilip, jetkizýshi tarapynan istiń aıaqtalmaıtynyn anyqtadyq. Máselen, jer kadastry departamentiniń 1,9 mln somadaǵy kelisim-shart mindetin oryndaý nátıjesi boıynsha otandyq taýar óndirýshi baǵanynda 100 teńge dep jazylǵan. Sáıkesinshe jergilikti quram úlesi 0,01%-ti quraǵan. Al 28,5 mln teńge somadaǵy kelisim-shart boıynsha otandyq taýar óndirýshi boıynsha jalpy soma kórsetilmegen», - dedi Qanaǵat Moldabekov.
Sonymen birge ol:
«Engizilgen túzetýler boıynsha jergilikti quram úlesi 87,6%-ti quraıtyn edi. 2018 jyly bul baǵyttaǵy jumys qatań baqylaýda bolady» dedi.
Bıyl basqarmaǵa taýar, qyzmet pen qyzmet kórsetýge memlekettik búdjetten 9,6 mlrd teńge bólingen.
Memlekettik satyp alý portalyna sáıkes (Almaty oblysy qarjy basqarmasynyń aqparaty boıynsha) aǵymdaǵy jyldyń eki aıynda jalpy somasy 78,9 mlrd teńge bolatyn 38 244 satyp alý uıymdastyrylǵan. Barlyq 3 250 jetkizýshi Qazaqstan Respýblıkasy rezıdenti bolyp tabylady.
Aıta keteıik, Otandyq taýar óndirýshilerge qoldaý kórsetý sheńberinde satyp alý salasyndaǵy jumys komısıasynyń otyrystary Taldyqorǵan qalasynda apta saıyn ótkizilip keledi. Kásipkerler palatasynyń alańynda ákimdikter men salalyq basqarmalardyń satyp alý salasy boıynsha jumystardy tyńdaý josparlanǵan. Ótken otyrysta Qarasaı aýdany jáne oblystyq densaýlyq saqtaý basqarmasynyń esepteri tyńdaldy.
