Úsharal qalasynda Alakól aýdany İsker áıelderiniń birinshi forýmy ótti, dep jazady Qamshy.kz aqparat agenttigi.
Atalmysh sharaǵa Almaty oblysy Kásipkerler palatasy Óńirlik keńesiniń tóraıymy, oblystyq İsker áıelder keńesiniń jetekshisi Rımma Salyqova, Almaty oblysy Kásipkerler palatasy adamı kapıtaldy damytý bóliminiń basshysy Almagúl Ońǵarbaeva, Alakól aýdany ákiminiń orynbasary Almas Ahanov, Kásipkerler palatasynyń Alakól aýdandyq fılıalynyń basshysy Muhtar Adıkov, Aqsý jáne Sarqan aýdandaryndaǵy İsker áıelder keńesi jetekshileri, sondaı-aq Alakól aýdanynyń kásipker áıelderi qatysty.
Almaty oblysy Kásipkerler palatasy Óńirlik keńesiniń tóraıymy, oblystyq İsker áıelder keńesiniń jetekshisi Rımma Salyqova atap ótkendeı, alakóldik bıznes hanymdarynyń keńesi aýdan áıelderiniń ekonomıkalyq jáne áleýmettik bastamalaryn qoldaýdaǵy basty qozǵaýshy kúshke aınalýy kerek.
«İsker áıelder keńesi quramyn keńeıtip, qataryna bıznes ókilderin ǵana emes, memlekettik mekemeler men qoǵamdyq uıymdardyń áıel basshylaryn da qosty. Ásirese, Keńes áıelderdiń bastamalary men suraqtaryn sheshýge qoldaý kórsetip otyrýy tıis», - dedi Rımma Salyqova.
Alakól aýdanynyń İsker áıelder keńesiniń tóraıymy Barshagúl Saıatova Keńestiń jańarǵan quramyn, jumys jospary men aldaǵy mindetterimen tanystyrdy. Aýdandyq İsker áıelder keńesi janynan kásipkerlik salalaryndaǵy máselelerdi jiti qarastyryp otyratyn salalyq komıtetter qurylatyn bolady.
«Búginde aýdannyń 1431 áıel kásipkeri aýyl sharýashylyǵy, densaýlyq saqtaý, bilim berý, týrızm, qonaq úı bıznesi, saýda isi syndy kásipkerliktiń barlyq salasynda jumys isteıdi. Osylaısha, kásipkerlik sýbektileriniń 60%-in áıel azamattar basqaryp otyr. Bizdiń aldymyzda jegilikti atqarýshy bılikpen ózara qarym-qatynas deńgeıin kúsheıtý, jas kásipkerlerge qoldaý bildirý mindetteri tur», - dedi Barshagúl Saıatova.
Óńirdiń áleýmettik-ekonomıkalyq damýyndaǵy aýqymdy úlesin aýdan ákiminiń orynbasary Almas Ahanov erekshe atap ótti.
«Atap ótý kerek, búgingi naryqta sharýa qojalyǵyn basqaratyndardyń basym bóligi áıel adamdar. Sonymen qosa, jaqsy kórsetkishterge qol jetkizip júr. Áıel kásipkerlerdiń áleýmettik jaýapkershiligi óte joǵary, olar belsendi túrde qaıyrymdylyqpen aınalysyp keledi», – dedi aýdan ákiminiń orynbasary.
Aýdan ishinde zor qaıyrymdylyq qyzmeti úshin «Alıa» JK dırektory Gúlzada Sembınova, jeke kásipkerlikti damytýǵa qosqan úlesi úshin «Mýkýbaeva» JK jetekshisi Qızat Muqybaeva men «Aqsaǵym» balabaqshasynyń dırektory Áıgerim Qanathan alǵys hattarmen marapattaldy.
Talqylaý barysynda áıel kásipkerliginiń damý problemalary, áıel-kásipkerlerdiń ekonomıkalyq bastamalaryn qoldaý men qarjylyq saýattylyǵyn arttyrý boıynsha suraqtar kóterildi. Shara aıasynda aýdan bıznes hanymdarynyń jetistikterine arnalǵan «Tabysker áıel kelbeti» kórmesi uıymdastyrylyp, qatysýshylarǵa kásipker Qızat Muqybaevanyń tabys oqıǵasy aıtyldy.
Sonymen birge, forýmǵa «Damý» qorynyń óńirlik fılıaly dırektorynyń orynbasary Rýslan Samakeev pen qordyń bas menedjeri Jandos Nurǵazınov, «Alakól» nesıe seriktestiginiń ókili Sábıt Darıvhan men psıholog Tolqyn Muqasheva qatysyp, sóz sóıledi.
Forým qorytyndysy boıynsha İsker áıelder keńesi Alakól kólindegi týrızmdi damytý máselelerine arnalǵan dóńgelek ústeldi uıymdastyrýdy josparlap otyr.
