Búgin Taldyqorǵan qalasyndaǵy «Iman» meshitiniń bastamasymen jáne oblys ortalyǵyna qarasty eldimekenderdegi jamaǵattardyń uıytqy bolýynyń arqasynda «Jetisý járdemi» atty qaırymdylyq kerýeni Aıagóz aýdanyna attandy. Jetisý jurtshylyǵy sýdan zardap shekken Shyǵys Qazaqstan oblysyna 16 tonnaǵa jýyq azyq-túlik jáne kıim keshek syndy turmysqa kerekti zattardy jiberdi.

Apat aıtyp kelmeıdi. Kóktem ýaqytynda kún jylynyp, qardyń erýine baılanysty SHQO-ǵy Aıagóz aýdanyn sý basyp, áp sátte halyqtyń berekesin qashyrdy. Búginde tosynnan kelgen apattan abdyrap qalǵan halyqtyń jaǵdaıy múshkil desek artyq aıtpaǵanymyz. Osyny eskergen Jetisý jamaǵaty bir kisideı atsalysyp, qaırymdylyq kerýenin attandyryp otyr.

«Aıagóz aýdanyn sý basqan sátte bizge Qazaqstan musylmandary dinı basqarmasynyń tóraǵasy, Bas múftı Serikbaı qajy Orazdyń atynan shuǵyl hat keldi. Onda sýdan zardap shekkenderge kómek qolyn sozý kerektigi aıtylǵan. Sol kezden bastap barlyq áleýmettik jelilerde habarlandyrý jarıalap, dereý iske kirisip kettik. Biz osy kezde halyqtyń yqylasyna tań qaldyq. Keıbir adamdar qol ushyn sozý maqsatynda ústindegi kımin sheship bergenderi de boldy», — deıdi Taldyqorǵan óńiriniń bas ımamy Ardaq Orazbaev.

Iá, meshit jamaǵaty bul iske zor yqylas tanytqan. Iaǵnı, qolynda ne bar, múmkindiginshe járdem kórsetýge tyrysyp baqqandyǵyn kórýge bolady. Biri azyq-túlikteı kómektesse, endi biri kıim-keshekterin ákelgen. «Júkterdi kólikke tıep júrgen azmamattarymyzǵa eshqandaı zat qalyp qalmasyn, tipti jerge shashylyp qalǵan kúrishtiń ózin sypyryp, salyp jiberińder. Qoradaǵy taýyǵyna jem qylyp bersin dep jatyrmyz. Nege? Sebebi, munyń barlyǵy halyqtyń shyn nıetimen bergen dúnıesi», — deıdi ımam.

Ardaq Núsiphanulynyń sózine súıensek, aıaq kıim satatyn bir saýdagerdiń ózi 30-40 danaǵa deıin sý jańa aıaq kıimderin ákelip bergen. Sondaı-aq, jınalǵan zattardyń ishinen qurylys materıaldaryn da keziktirýge bolady. Máselen, bir qurylys dúkeniniń ıesi quny 547 myń teńge turatyn jerge tóseletin lınoleýmyn qaıyrymdylyq kerýenine qosyp otyr.

Jalpy, búgin Taldyqorǵan óńirinen 10 tonnaǵa jýyq, al, Aqsý, Sarqan jáne Alakól aýdandarynan qosymsha taǵy 6 tonna zattaı kómek qosylyp, jolǵa shyqty. Ókil ımam «Jetisý járdemine» qarjylaı kómekteskenderdiń de qatary kóp ekenin aıtady. Kóp túkirse kól bolady demekshi, qaıyrymdylyq sharasynda 3 mılıon teńgeniń ústinde qarjy jınalǵan. «Biz osy isti qolǵa alǵan sátte nıet tanytyp, tamshydaı bolsa da óz úlesterin qosý maqsatynda 200-400 teńge ákelip bergen azamattar da boldy. Iaǵnı, árkim jaǵdaıyna qaraı kómekterin berip jatty. Qarıalarymyz zeınetaqylarynan 5000 teńgesin syndyryp, úlesterin qosyp jatyr. Osy aǵaıyndarǵa Alla razy bolsyn!», — deıdi A.Orazbaev.

Meshit jamaǵaty osy qarajatqa Aıagóz aýdanyndaǵy turmys tómen bir otbasyna úı alyp berýdi kózdep otyr. Aıtýlarynsha, generique cialis ol jaqtaǵy ortasha baǵadaǵy úıdiń quny úsh nemese úsh jarym mıllıon teńgeniń tóńireginde eken.

Atap aıtsaq, bul qarajattyń teń jartysy Taldyqorǵan qalasynyń jamaǵatynan, qalǵan bóligi oblys ortalyǵyna jaqyn ornalasqan eldimekenderden jınalǵan. Sonymen qatar, kerýendi bir ózi bastap bara jatqan ókil ımam Jetisý jurtshylyǵynyń atynan Aıagóz aýdanynda 350 adamǵa as beriletindigin de aıtyp qaldy.

«Dinı basqarmamyz bul qaırymdylyq kerýenin jiberýdi SHQO-na jaqyn ornalasqan óńirlerge tapsyrǵan bolatyn. Alaıda, Ońtústik Qazaqstan oblysy jáne Astana men Almaty qalasy eshqandaı tapsyrma almastan ózderi nıet tanytyp, olar da kerýenderin attandyryp otyr. Qaırymdylyq kórsetý — bizdiń qanymyzda bar qasıet. Ony bergen adamda da, alǵan adam da qýanady», — deıdi ókil ımam.

Ardaq Núsiphanuly osy sharaǵa bir kisideı atsalysqan barlyq meshit jamaǵatyna jáne habarlandyrýdy jarnamalap, elge jetkizip otyrǵan BAQ ókilderine, blogerlerge shynaıy alǵysyn bildirdi.

Baıken Sadaýaqasov, Taldyqorǵan qalasynyń turǵyny, meshit jamaǵaty:

— Mine, Taldyqorǵan óńiriniń bas ımamy Ardaq ustazymyz bastap, ol kisini barlyq meshit jamaǵaty biraýyzdan qoldap sýdan zardap shekken aǵaıyndarǵa qoldan kelgenshe qómek qolyn sozyp jatyr. Nıet tanytqan barlyq baýyrlarymyzǵa Alla razy bolsyn. Apat aıtyp kelmeıdi. Bul da bir Allanyń bizge jibergen synaǵy dep bilemiz. Tek, soǵan sabyr qalyp, moıynsyna bilýimiz kerek. Osyndaı qıyn qystaý kezeńde bir-birimizge tireý bolyp, kómektesip jatsaq — qazaqtyǵymyzdyń, musylmandyǵymyzdyń nyshany dep bilemin.