Bıyl Astana qalasynyń jıyrma jyldyǵy Respýblıka kóleminde keńinen atalyp ótilmek. Ataýly dataǵa oraı Almaty oblysynyń mádenıet, arhıvter jáne qujattama basqarmasynda Elordamyzdyń shırek ǵasyrǵa jýyq ýaqytta jetken jetistikterin talqylaý maqsatynda dóńgelek ústel otyrysy ótti.
Jıynǵa İ.Jansúgirov atyndaǵy JMÝ-dyń oqytýshylary, sala mamandary jáne BAQ ókilderi qatysty. Basqosý barynda «Almaty oblystyq memlekettik muraǵaty» mekemesiniń jeke quram boıynsha Taldyqorǵan fılıalynyń dırektory Erkebulan Baqabaev alǵash sóz aldy. Ol Astana qalasynyń jıyrma jyldyǵyna oraı atqarylatyn sharalar jaıyn aıtyp, buǵan arhıvter salasynyń da qosar úlesi bar ekenin tilge tıek etti. Sonymen qatar mekeme basshysy: «Elbasymyz osydan 20 jyl buryn Astanany Aqmola qalasyna kóshirgen jaǵdaıda damýdyń 32 tıimdiligi bar ekenin aıqyndap bergen bolatyn. Búginde biz sonyń kórinisine kýá bolyp otyrmyz», — dep atap ótti.
Sonymen qatar jıynǵa qatysqan sala mamandary Astananyń jıyrma jyldaǵy damýyn úsh kezeńge bólip qarastyrdy. Iaǵnı, ol 1998-2005 jyl, 2005-2010 jyl jáne 2011 men 2017 jyldar. Máselen, 1999 jyly IýNESKO sheshimimen Astana beıbitshilik qalasy atansa, 2000 jyly halyqaralyq astanalar men iri qalalar ishindegi assambleıaǵa elordamyz múshe bolǵan. Sondaı-aq, ár jylda sánimen sáýleti kelisken ásem ǵımarattardyń boı kótergendigi jáne Uly dala tórinde ótken «Ekspo-2017» halyqaralyq kórmesi aıtýǵa turarlyq maqtanysh.
Kelesi de sóz tizginin İ.Jansúgirov atyndaǵy JMÝ-dyń gýmanıtarlyq fakúlteti, jýrnalısıka kafedrasynyń meńgerýshisi Jumaǵalı Esenbek aldy. Ol atalmysh ýnıversıtette Astananyń 20 jyldyǵyna oraı stýdentterdiń qatysýymen túrli mádenı tanymdyq sharalar ótip jatqandaǵyn aıtty.
Al, óz kezeginde sóz alǵan Qazaqstan tarıhy kafedrasynyń oqytýshysy Qýanǵan Ónerbek Elbasynyń sarabdal saıasatyn tilge tıek etti. «Prezıdentke elordany Almatydan Aqmola qalasyna kóshirý ıdeıasy tosynnan kelmegen edi. Iaǵnı, memlekettiń astanasy shekaraǵa jaqyn turý úlken qaýipti tóndiredi, sondyqtan ol Qazaqstan kartasynyń naq ortasynda ornalasý kerek. Osy jaǵynan alǵanda Elbasymyz durys sheshim qabyldaǵan», — dep keltirdi.
Sonymen qatar Q.Ónerbek elordany basqa shaharǵa aýystyrý týraly sheshim shyqqanda kandıdat qalalardyń ishinen Taldyqorǵan eń kóp daýys jınaǵandyǵy týraly qyzyqty málemet aıtty. Aıtýynsha, tabıǵaty qolaıly jáne ekonomıkasy jaǵynan úlken magıstraldy joldyń boıynda jatqandyqtan jasyl jelekti shahar 74 paıyz daýys jınaǵan. Ekinshi oryndy Qaraǵandy alsa, Aqmola úshinshi oryndy quraǵan. Alaıda, Elbasy Astana ortalyqta bolý kerektigin eskerip, Aqmola qalasyn tańdap alǵan. Odan bólek, Aqmolany tańdap alýdaǵy basty sebepterdiń biri – Soltústik óńirdi qazaqshalandyrý bolsa, ekinshi jaǵy sol jaqtyń ekonomıkasyn damytý. Osyndaı jaıttar Aqmola qalasynyń eldiń astanasy atanýyna sebep bolǵan eken.
Dóńgelek ústelge jınalǵandar osylaısha Elordanyń 20 jylda jetken jetistikterin sóz etip, aldaǵy ýaqytta da damyp, janaı túsýine tilektes ekendikterin jetkizdi.
Jıyn sońynda mekeme basshysy Erkebulan Baqabaev arhıv salasynda atqarylyp jatqan jumystardy atap ótti. «Búginde qarapaıym halyq arhıv qyzmetkerlerin tek shań basqan qujattardy retke keltirip nemese elderdiń suranysyna jaýap berýmen ǵana aınalysady dep oılaıdy. Negizi, arhıvtiń úsh negizgi baǵyty bar. Alǵashqysy qundy qujattardy qadaǵalaý bolsa, odan keıin sol qujattardy jınaqtaý jáne ony halyqqa jetkizý. Biz osyndaǵy qundylyqtardy neǵurlym halyqqa ońaı, ári tıimdi jetkizý maqsatynda túrli baǵytta anyqtamalyq kitaptardy shyǵaramyz. Máselen, 1932-2000 jyldarda Almaty obylysynyń aýmaǵynda oryn alǵan tarıhı ózgerister týraly kitabymyz jaryq kórdi. Oılap qarasań munyń barlyǵy úlken eńbekti talap etedi», —deıdi.
