Jetisýdyń astanasy Taldyqorǵanda ótetin Naýryz merekesine daıyndyq jumystary qyzý júrgizilýde. Ipodromda ulttyq oıyn túriniń biri — salym kókpar,  “Jastar” saıabaǵynyń aýmaǵynda “Naýryz kóje” men “Baýyrsaq party”, qolóner buıymdarynyń kórmesi,  sporttyq jarystar ótkizý josparlanýda. Sondaı-aq, jıyrma qazan palaý tegin taratylatyn bolady. Osy jáne ózge de birqatar aqparattar  Óńirlik komýnıkasıalar qyzmeti alańynda ótken baspasóz máslıhatynda belgili boldy.

Jıynǵa qatysqan  Almaty oblystyq Qazaqstan halqy Assambleıasy tóraǵasynyń orynbasary, hatshylyq meńgerýshisi Ǵabıt Tursynbaı men Taldyqorǵan qalasy ákiminiń orynbasary Marlen Kólbaev atalmysh merekeniń aımaǵymyzda atap ótilýi jaıynda keńinen tarqatyp berdi. Ǵabıt Tursynbaıuly: “Qazaqstandyqtar úshin Naýryz merekesi bıyl erekshe bastalýda. Osy kezeńde bir-birine jaqsylyq jasaý, qýantý, syılyq syılaý  halqymyzdyń ejelden kele jatqan qalyptasqan dástúri. Bizdiń óńirimizde  kóptegen ıgi sharalar uıymdastyryldy. Sonyń basym kópshiligi Ulystyń uly kúni qarsańynda atqarylady. Sebebi, Naýryz berekeli jyldyń basy”-dep mereıli merekeniń 14 naýryz Kórisý kúninde bastaý alǵandyǵyn tilge tıek etti.  Aıta keteıik, mádenıet ókilderi oblysymyzǵa qarasty aýyl, aýdandy  aralap  konsertter uıymdastyryp, merekelik sharalar salt-dástúrler sherýimen jalǵasyn tabady.

 “Naýryz aýylyna” bes qazaq úı tigiledi. Taldyqorǵandyqtar estradamyzdyń jaryq juldyzdary Janar Duǵalova, Aıgerim Qalaýbaeva, Oljas Abaı, Muqasan Shahzadaevtyń ásem ánimen qatar akrobattardyń da ónerine kýá bolady.  “Jalpy merekelik shara “Jastar” sport kesheniniń, “Rýhanı jańǵyrý” ortalyǵynyń aýmaǵynda jáne “Jastar” saıabaǵynyń alańynda  ótedi. Meıram ádettegideı  bulaq kózin ashýdan bastalady. Jınalǵan qaýym bıyl oblys aqyndary arasynda ótetin   aıtysty tamashalaı alady. Naýryz -jyl basy. Jer-Ana býsanyp, tirshilik jandanatyn kezeń. Osyǵan sáıkes saıabaqta “Naýryz tal otyrǵyzý”  rásimi júrgiziledi. Iaǵnı, sharaǵa qatysqysy keletin barsha janǵa   kóshetter taratylady”-dep Marlen Qapashuly atap ótti.