Taldyqorǵan medısınalyq kolejinde qoǵamdyq densaýlyq saqtaý salasynyń mamandaryn daıyndaýdaǵy ózekti máseleler men keleshekte damýy talqyǵa tústi. Sharaǵa medısınalyq JOO-nyń jetekshi ǵalymdary men oqytýshylary, dárigerler, qoǵamdyq densaýlyq saqtaý departamenti men Óńirlik kásipkerler palatasynyń mamandary qatysyp, usynystaryn bildirdi.

Kolej ókilderi «Gıgıena jáne epıdemıologıa» mamandyǵy boıynsha bilim berý baǵdarlamasy eskirgen jáne jumys berýshilerdiń talaptaryna sáıkes kelmeıdi dep esepteıdi eken.

«Densaýlyq saqtaý júıesinde profılaktıkalyq medısınanyń ustanymyn tájirıbede iske asyratyn qoǵamdyq densaýlyqty qorǵaý salasynyń orny erekshe. «Gıgıena jáne epıdemıologıa» mamandyǵy boıynsha bekitilgen memlekettik jalpyǵa mindetti bilim berý standarty zaman talaby men onyń sharttaryna jaýap bermeıdi. Praktıkada jumys berýshiler túlekterden múldem basqa mindetter talap etetin kórinedi», – dedi Taldyqorǵan medısınalyq kolejiniń dırektory Serik Janseńgirov.

S.Asfendıarov atyndaǵy QazUMÝ profesory Sáken Ámireev maman daıyndaý máselesin respýblıkalyq deńgeıge kóterip, bilim berý standarttaryna qajetti ózgertýler engizý kerektigin aıtty.

«Barlyq salalar men baǵyttar boıynsha damý men jańǵyrtý júrip jatyr. Biz bir orynda qalyp qalǵan sıaqtymyz. Mamandyq boıynsha stýdentter testileýdi óte almaıdy. Sebebi, baǵdarlamada kóptegen taqyryptar qamtylmaǵan. Mysaly, shet elderde osy mamandyq bar bolǵanymen basqasha atalady. Kóterilip otyrǵan suraqty keń kólemde talqylap, joǵary oqý ornymen birigip ortaq mámilege kelý kerek», – dep atap ótti Sáken Ámireev.

Osyǵan baılanysty «Gıgıena jáne epıdemıologıa» mamandyǵy boıynsha túlekter arasynda jumysqa ornalasý deńgeıi tómen. Sonymen birge sarapshylar qorytyndy attestasıalaýdy eki kezeń boıynsha ótkizý, elektıvti pánder engizý syndy usynystar aıtyldy.

“Dýaldi oqytýdy engizý, máseleni sheshýdiń bir joly bolyp tabylady. Dýaldi júıe oqytý úrdisinde teorıalyq jáne praktıkalyq daıyndyqty biriktire alady. Oqý baǵdarlamasy jumys berýshiniń tapsyrysymen jáne tikeleı qatysýymen ázirlenip, bir mamandyq boıynsha oqý materıaldarynyń kólemin pán boıynsha bólýge múmkindik beredi. Osylaısha, Dýaldi oqytý júıesin damytýdyń jol kartasy aıasynda oqý baǵdarlamasyna ózgertý engizýge bolady”, – dedi Almaty oblysy Kásipkerler palatasynyń sarapshysy Ardaq Qashqarova.

Talqylaý qorytyndysy boıynsha medısınalyq kolej aldaǵy ýaqytta Almaty oblysynyń Dýaldi oqytýdy damytýdyń jol kartasyna ený men memlekettik jalpyǵa mindetti bilim berý standartyna birqatar ózgertýler engizýdi josparlap otyr.

Eske salsaq, Taldyqorǵan medısınalyq kolejiniń 80 jyldyq tarıhy bar. Búgingi tańda oqý orny segiz mamandyq boıynsha kadr daıyndaıdy.