Halyq qaharmany, Áskerı-áýe kúshteriniń general-maıory, Taldyqorǵannyń týmasy Aıdyn Aıymbetovke «Almaty oblysynyń Qurmetti azamaty» ataǵy berildi. Ǵaryshkerge arnaıy káýlikti Naýryz merekesin toılaýǵa jınalǵan kópshilik aldynda Almaty oblysynyń ákimi Amandyq Batalov tabys etti.
Táýelsizdik kúnine arnalǵan saltanatty jıyn barysynda óńirdegi ónerkásip, agrarlyq sala, densaýlyq saqtaý, bilim berý, kásipkerlik, sport jáne áleýmettik qyzmet kórsetý salalarynyń úzdik mamandaryna uzaq jylǵy eńbegi men jemisti qyzmeti úshin «Parasat», «Qurmet», III dárejeli «Eńbek dańqy» ordenderi, «Eren eńbegi úshin», «Shapaǵat» medaldary, Qazaqstan Respýblıkasynyń Qurmet gramotasy, «Almaty oblysynyń Qurmetti azamaty» ataǵy berildi. Olardyń qatarynda belgili mesenat Baýyrjan Ospanov «Parasat» ordenimen, Almaty oblysy ákiminiń orynbasary Jaqsylyq Omar jáne oblystyq dene shynyqtyrý jáne sport basqarmasynyń basshysy Turatbek Charapıev «Qurmet» ordenimen marapattalsa, «Qazaqstannyń 100 jańa esimine» engen Eldos Baıalyshbaev «Shapaǵat» medalin ıelendi. Al Jetisý jeriniń týmasy, úshinshi qazaq ǵaryshkeri Aıdyn Aıymbetov «Almaty oblysynyń Qurmetti azamaty» atandy.
Taldyqorǵanda ıgi dástúr boıynsha Naýryz meıramy qala syrtyndaǵy bulaqtyń kózin ashýdan bastaldy. Oblys basshysy aqsaqaldarmen, «Jasyl el» jasaǵynyń múshelerimen birge saıabaq ishine aǵash ekti. Jetisý tórinde búgingi merekege oraı 1 myń lıtr naýryz kóje men 10 myń adamǵa palaý ázirlenip, halyqqa tegin taratyldy. Soǵan sáıkes, Naýryz aýylynda «Naýryz kóje ishińiz!», «Baýyrsaqtan dám tatyńyz!» atty arnaıy sharalar uıymdastyryldy. Merekeni tamashalaýǵa shyqqan qala turǵyndary arqan tartysyp, asyq atyp, gir tasyn kóterip, toǵyzqumalaq oınady, túrli kórmelerdi tamashalady. Al Taldyqorǵan ıpodromynda dala qyzyqtary ótti. Aýdaryspaq, qyz qýý, teńge ilý uıymdastyrylyp, kókparshylar saıysyna qarjylaı syılyqtar tigildi.
Mereke konserttik baǵdarlamaǵa ulasyp, halyqqa kóterińki kóńil-kúı syılaýda. Aýa-raıy da tamasha bolyp tur. Termometr baǵany + 22 gradýsqa deıin kóterildi. Al keshke «Jastar» saıabaǵynda bı keshi uıymdastyrylady.
Nagrada alǵandar atynan «Núsipov jáne K» JSHS dırektory Qanathan Núsipov pen «Suńqar Almaty» qus fabrıkasynyń bas dırektory Dmıtrıı Chalyh sóz sóılep, óz quttyqtaýlaryn jetkizdi. Saltanatty jıyn sońy konserttik baǵdarlamaǵa ulasty.
