Búgingi úkimet saǵatynda ulttyq ekonomıka mınıstri Tımýr Súleımenov jekeshelendirýdiń ekinshi tolqynynyń negizgi ereksheligine toqtalyp ótti, dep habarlaıdy Qamshy.kz aqparat agenttigi.

Mınıstrdiń aıtýynsha, zamanaýı tehnologıalardy paıdalaný – jekeshelendirýdiń ekinshi tolqynyna tán erekshelik. Qazirgi tehnologıalardy paıdalana otyryp, jekeshelendirý máselesinde ýaqytty únemdeý úshin elektrondy formatta saýda-sattyq júrgizý týraly normalar engizilgen. QR Ulttyq ekonomıka mınıstri mundaı saýda-sattyq túriniń ýaqytty únemdep, paıdalanýshylar úshin yńǵaıly bolatynyn jáne saýda-sattyqta «adamı faktorlardy» tolyǵymen joıatynyn aıtty.

«Memlekettik menshik tiziliminiń veb-portalynda (gosreestr.kz) elektrondy formatta saýda-sattyq júrgizý týraly norma engizildi. Satýshylar men satyp alýshylar úshin «bir tereze» qaǵıdaty boıynsha saýda-sattyqty júrgizý jekeshelendirý obektilerin satý kezinde ashyqtyqty, jarıalylyqty qamtamasyz etedi. Veb-portal tirkeýshi organdardyń bazalarymen biriktirilgen.

Biryńǵaı saýda alańy jalpyǵa qoljetimdi jáne tek qatysýshy ǵana emes, kez kelgen nıet bildirýshi de jekeshelendirý obektileriniń tizbesimen tanysyp, saýda-sattyq qorytyndylaryn, baǵalardy, keleshek josparlardy, satylatyn obektilerdiń sıpattamalary men esebin qaraı alady. Sondaı-aq Android jáne IOS-qa mobıldi qosymshalar ázirlenip, koll-ortalyq jumys isteýde», - dep málimdedi mınıstr Súleımenov.