Búgin Qazaqstan jáne Ózbekstan musylmandary dinı basqarmalary Tashkent qalasynda ózara yntymaqtastyq týraly Memorandým qabyldady.

Bas múftı Serikbaı qajy Orazdyń Ózbekstanǵa jasaǵan resmı sapary barysynda eki eldiń múftıleri din salasyndaǵy uzaqmerzimdi yntymaqtastyqty ornatýǵa arnalǵan qujatqa qol qoıdy.

Memorandým Qazaqstan men Ózbekstan arasyndaǵy dostyq qarym-qatynasty odan ári nyǵaıtýdy, eki elge ortaq dinı mektepti jańǵyrtýdy, birizdi pátýalar shyǵarýdy, mádenı-rýhanı baılanysty arttyrýdy, tájirıbe almasýdy, ǵylymı jobalardy júzege asyrýdy, din qyzmetkerleriniń biliktiligin kóterýdi kózdeıdi.

Memorandým negizinde Taraptar bir-birine halyqaralyq deńgeıde ózara kómek pen qoldaý kórsetýge mindetteledi. Yntymaqtastyq sheńberinde eki eldiń bolashaq urpaǵyna patrıotızm men beıbitshilik qundylyqtary nasıhattalyp, Islamnyń rýhanı baǵa jetpes murasy men mádenıeti dáripteledi.

Atalǵan yntymaqtastyq Quranǵa, hadısterge jáne hanafı mazhabynyń ilimine, Qazaqstan jáne Ózbekstan Respýblıkasynyń halyqaralyq mindettemeleri men ulttyq zańnamalaryna negizdeledi.

Sonymen qatar azamattardyń eki el aýmaǵynda ornalasqan tarıhı qasıetti jerlerge zıarat etýi qamtamasyz etiledi.

Taraptar bekitilgen dinı pátýalar negizinde dinı merekelerdi Hıjrı jyl sanaýy boıynsha birizdi ótkizýdi qolǵa alady.

Qazaqstan musylmandary dinı basqarmasynyń tóraǵasy Serikbaı qajy Orazdyń Ózbekstanǵa jasaǵan resmı sapary barysynda eki eldiń dinı merekelerine qatysty ortaq pátýa shyǵarý týraly kelisim jasaldy.

Bas múftı Serikbaı qajy Satybaldyuly men Ózbekstan musylmandary dinı basqarmasynyń tóraǵasy Osmanhan qajy Alımovtyń qatysýymen ótken eki jaqty kezdesýde dinı merekelerdi birizge túsirý máselesi talqylandy.

Resmı basqosýda Serikbaı qajy Oraz qazaq-ózbek ultynyń ustanatyn mázhaby men dinı senimi bir ekenin atap ótip, dinı merekelerdi birizge túsirý qajettigin sóz etti. Óz kezeginde Ózbekstan múftıi Osmanhan Alımov bul usynysty qoldaıtynyn málimdep, baýyrlas elderdiń dinı saladaǵy baılanysyn odan ary nyǵaıta túsý kerek ekenin tilge tıek etti.

Eki jaqty kezdesý nátıjesinde ortaq memorandým qabyldandy.

«Taraptar dinı merekelerdi (oraza, qurban aıt, t.b.) Hıjrı jyl sanaýy boıynsha birizdi ótkizýge, zamanaýı ózekti máselelerde ortaq pátýa, sheshim shyǵarýǵa mindetteledi», – delingen ózara yntymaqtastyq týraly memorandým mátininde.

«Ózderińizge belgili, osyǵan deıin bizdiń aramyzda dinı merekelerdiń kúnine qatysty aıyrmashylyqtar boldy. Osy olqylyqtyń ornyn toltyrý maqsatynda ózbekstandyq áriptesterimizben kelisim negizinde ózara yntymaqtastyq týraly memorandým qabyldadyq. Memorandýmda kórsetilgen máseleler boıynsha ózekti taqyryptar aıasynda ortaq pátýalar men sheshimder qabyldaıtyn bolamyz», – dedi Bas múftı Serikbaı qajy Oraz ózbekstandyq BAQ ókilderine bergen suhbatynda.