QR Úkimet basshysy Baqytjan Saǵyntaev búgingi Úkimet otyrysynda Reseıde bolǵan jantúrshigerlik órtke qatysty óz pikirin bildirdi, dep jazady Qamshy.kz aqparat agenttigi.
«Reseıdiń Kemerovo qalasynda úlken apat bolyp, qaıǵyly jaǵdaı oryn alǵany bárimizge belgili. Alapat órttiń saldarynan kóz jumǵandardyń kópshiligi kishkentaı balalar. Bizdiń Elbasymyz resmı túrde Reseı basshysyna kóńil aıtty. Biz de bul tótenshe oqıǵadan sabaq alýymyz kerek. Qazirdiń ózinde bul másele áleýmettik jelilerde óte joǵary deńgeıde talqylanyp jatyr. Blogerler ózderiniń bastamasy boıynsha saýda ortalyqtaryna baryp, apattyq esikterdiń ashyq nemese jabyq turǵanyn tekserip júr. Sol sebepti İshki ister mınıstrligi, órtke qarsy qyzmetter men ákimdikter birlesip, saýda ortalyqtarynda tekserý ótkizip, tıisti sharalardy qolǵa alýy qajet», - dep atap ótti Baqytjan Saǵyntaev.
Esterińizge sala keteıik, Máskeý ýaqyty boıynsha 26 naýryzǵa qaraǵan túni Kemerovo qalasyndaǵy «Zımnáá vıshná» saýda ortalyǵynyń kınoteatr men balalardyń oıyn alańdary ornalasqan tórtinshi qabatynda órt shyqqan bolatyn. Kýágerlerdiń aıtýynsha, órt shyqqan kezde dabyl berý júıesi jumys istemegen eken. Sońǵy derekter boıynsha, órttiń saldarynan qurban bolǵandardyń sany 64-ke jetip, 70-ke jýyq adam iz-túzsiz joǵalǵan. Onyń kópshiligi – balalar.
