Búgingi Úkimet otyrysynda QR İİM orynbasary Janat Súleımenov premer-mınıstrden sóz estip qaldy, dep habarlaıdy Qamshy.kz aqparat agenttigi.
Janat Súleımenov SHQO-daǵy sý tasqynyna qatysty baıandama jasap, Úkimet basshysyna esep bergen edi.
– Qurmetti Baqytjan Ábdiruly, qazirgi ýaqytta SHQO-da 400 úı sý astynda qalyp otyr. 326 turǵyn úıden sý soryp alyndy. Qazirgi ýaqytta Qaraǵandy oblysynda sý basqan 12 úıden sý tolyǵymen soryp alyndy. Kúshter men quraldar tobyn kúsheıtý úshin SHQO-ǵa İshki ister mınıstriniń orynbasary Ilınniń basshylyǵymen İİM jedel toby jiberildi. 92 adam jeke quramnan, 14 birlik tehnıkadan, 58 motopompadan jáne 8 júzý quralynan turatyn kúshter men jabdyqtar qosymsha jetkizildi. Avarıalyq qutqarý jáne shuǵyl jumystarǵa 454 quramnan jáne 203 birlik tehnıkadan turatyn kúshter jumyldyrylǵan. Baıandama aıaqtaldy, - dedi ishki ister mınıstriniń orynbasary.
– Danıal Kenjetaıulynyń usynysyna baılanysty ne aıtasyz? – dedi premer-mınıstr.
– Ol másele boıynsha biz demalys kúnderi Ulttyq ulan ushaqtarymen OQO, Almaty, Pavlodar oblysynan qosymsha kúsh retinde jeke quram men tehnıkalar jetkizdik, - dep jaýap qatty Janat Súleımenov.
– Durys. Joq bolǵannan keıin basqa oblystardan alyp otyrsyz ǵoı. Al Danıal Kenjetaıuly aıtyp otyr: «Norma boıynsha osynsha bolý kerek, al shyn máninde óte tómen sıfr», - dep. Qandaı sharalar jasalyp jatyr mınıstrliktiń tarapynan? - dep suraǵyn naqtylady Saǵyntaev.
– Ruqsat bolsa, ol týraly baıandamam, sıfrlarym joq, - dep kúmiljigen Súleımenov premer-mınıstrdiń synyna ushyrady.
– Baıandamańyzǵa ol másele jóninde jazyp bergen joq qoı. Sonda sizder qalaı basqarasyzdar? Baıandama jazyp bergendi oqyp beresiz, jazbasa, jaǵdaıdyń qandaı bolyp jatqanyn bilmeısizder de. Sońynan kelip osyndaı jaǵdaılarǵa dýshar bolamyz, Tehnıka joq, gıdrokombenızon joq, motopompa joq. Qıyn jaǵdaı bolsa, kórshi oblystardan surap alamyz. Túsinikti, - dedi Baqytjan Saǵyntaev.
