QR mádenıet jáne sport mınıstri Arystanbek Muhamedıuly tilderdi damytýdyń memlekettik baǵdarlamasy qalaı júzege asyp jatqanyn baıandady, dep habarlaıdy Sputnik Qazaqstan-ǵa silteme berip Qamshy.kz aqparat agenttigi.
Mınıstrdiń aıtýynsha, jyl saıynǵy zertteý qazaqstandyqtardyń deni memlekettik tildi meńgergenin kórsetken.
"2017 jyly memlekettik tildi meńgergen turǵyndar úlesi 83,1 paıyzdy qurady, al 2016 jyly odan da az bolatyn. Úsh tildi meńgergen eresek turǵyndardyń úlesi 22,3 paıyzdy qurady. Úsh tildi meńgerý aıasynda memlekettik qyzmetshilerdi oqytýdy uıymdastyrý qyzmetin júzege asyrý maqsatynda QR prezıdenti janyndaǵy memlekettik basqarý akademıasymen ózara túsinistik týraly kelisimge qol qoıyldy", — dedi Muhamedıuly.
Mınıstr byltyr joba aıasynda ortalyq atqarýshy organdarda memlekettik tildi oqytý kýrsyna 610 adam qatysqanyn atap ótti. Sonymen qatar respýblıkada 89 aımaqtyq memlekettik tildi oqytý ortalyǵy jumys isteıdi.
"Oqytý ortalyqtary Til týraly zańǵa sáıkes Qazaqstan azamattarynyń memlekettik tildi meńgerýi maqsatynda oqytý kýrstaryn uıymdastyrady. Osy maqsatta 2017 jyly til oqytý ortalyqtarynda 58 myń 348 adam memlekettik til oqytý kýrstarynan ótti. Qaztest júıesi negizinde qazaq tilin bilý deńgeıin anyqtaý maqsatynda 2017 jyly testileýden ótkenderdiń jalpy sany – 94 458 adam, onyń ishinde memlekettik qyzmetshiler sany – 22837 adam", — dedi mınıstr.
