Temirtaý qalalyq soty adamnyń densaýlyǵyna qasaqana aýyr zıan keltirgen Dmıtrıı Zımındi kináli dep tapty, dep habarlaıdy Qamshy.kz aqparat agenttigi QazAqparatqa silteme jasaı otyryp.

«Dmıtrıı Zımın Qazaqstan Respýblıkasy Qylmystyq kodeksiniń 106-baby 2-bóligi 7 jáne 11 tarmaqshasy boıynsha kináli dep tabylyp, oǵan 5 jyl bas bostandyǵynan aıyrý jazasy taǵaıyndalsyn. Qazaqstan Respýblıkasy Qylmystyq kodeksiniń 63-babyna sáıkes, Zımınge berilgen jaza taǵaıyndalǵan barlyq merzimde probasıalyq baqylaý ornatýmen shartty dep belgilensin», - delingen úkimde.

Sottyń anyqtaýynsha, 2017 jyldyń 24 tamyzynda Zımın óziniń tanysymen birge mas kúıde bolǵan. Óz úıindegi balkonnan ol qumda oınap otyrǵan eki balany kórip qalady. Sot materıaldaryna sáıkes, dál osy kezde onyń qylmystyq pıǵyly týyndaǵan.

«Qylmystyq pıǵylyn iske asyrý maqsatynda Zımın «MR 512» markaly pnevmatıkalyq vıntovkasyn alyp shyǵyp, ony qorǵasyn oqpen oqtaǵan. Osydan keıin ol balkonynyń tabaldyryǵynan attap, densaýlyqqa aýyr zıan keltirý pıǵylymen qorǵasyn oqpen balalardy atqan. Alaıda oq qumǵa tıgen», - delingen sot materıaldarynda.

Budan soń Zımın vıntovkasyn qaıtadan qorǵasyn oqpen oqtap, balalarǵa qarata atqan. Osynyń saldarynan oq balanyń biriniń keýdesiniń oń jaq tusyna tıgen. Keýdege tıgen oq gemo-pnevmotorakspen birge ókpege zaqym keltirgen. Jaraqat alǵan bala aýrýhanaǵa jetkizilgen. Al Zımın oqıǵa ornynan qashyp ketken edi.