Ońtústik Qazaqstan oblysy, Saryaǵash aýdanynda jeti jasar qyz joǵalyp ketti dep jazady Qamshy.kz aqparat agenttigi QazAqparatqa silteme jasaı otyryp. Bul týraly balanyń anasy Aqbota Káýkeshova habarlady.
Onyń aıtýynsha, birinshi synypta oqıtyn Inabat Muhtarqoja Aqnıet aýylyndaǵy naǵashylaryna qydyryp barǵan. Al keshe, 26 naýryzda kúndizgi saǵat bir men ekiniń arasynda týystary ony tappaı qalǵan.
«Ózimiz Arys aýdanyna qarasty Qojatoǵaı aýylynda turamyz. Qyzymyz naǵashylaryna qydyryp barǵan edi. Sol kúni esiktiń aldyna oınap júrgen eken. Jarty saǵattyń arasynda joq bolyp ketken. Qazir bárimiz osynda kelip, izdep jatyrmyz. Qandaı da bir boljam da jasaı almaı otyrmyz. Esh habar joq. Aqyl esi jaqsy. 2010 jyly týǵan, birinshi synypta oqıdy», - deıdi anasy.
Týystary balanyń joǵalǵany týraly tártip saqshylaryna da habarlaǵan. İzdestirý jumystary júrip jatyr.
«Sol kúni-aq polısıaǵa habar berdik. Qazir olar da izdeý sharalaryn júrgizip jatyr. Jergilikti arnaǵa da kómek surap bardyq»,- deıdi Aqbota Káýkeshova.
