Ymyrt úıirilgende QazUÝ (ol ýaqytta QazMÝ) qalashyǵyndaǵy jastar syrtqa shyǵýǵa qorqatyn. Sebebi jarty jyl ishinde bul jerde zorlanyp óltirilgen 3 qyzdyń máıiti tabylǵan.
Bul Sovet odaǵy ydyrap jatqan kez edi. Elimizdegi eń iri ýnıversıtetti úreı jaılady. Qyz-kelinshekter emin-erkin júrýden qaldy.
Qalashyqta paıda bolǵan «manák» týraly qaýeset jastar arasynda gýlep ketti.
Birinshi qurbannyń máıitin ýnıversıtetke kórshiles kópqabatty úıden oıyn balalary taýyp alǵan. Baýyzdalǵan qyzdy kórgen alty jastaǵy bala talaıǵa deıin sóıleı almaı qalypty. Jas qyz zorlanǵan, sómkesi tonalǵan. Basynda mılısıa qandaı da bir «manák» jaıly oılamaǵan da.
Mamandar qyzdyń máıitine saraptama jasap, qylmyskerdiń qan tobyn anyqtady. Qany II topqa jatatynyn bilgen soń mılısıa osy aıǵaqty negizge alyp, buryn-sońdy jaýapqa tartylǵandardy tekseredi. Alaıda odan nátıje shyqpaıdy.
Bir aı ótken soń Almatynyń İİB qyzmetkerleri İİM-nen kómek suraıdy. Óıtkeni taǵy bir qyz iz-túzsiz joǵalǵan. QazUÝ tóńiregin sharlaǵan mılısıa eshteńe taba almaıdy. Bul qylmystarǵa «manáktyń» qatysy bary aıqyn bolady.
Qanisherdiń kim ekenin anyqtaý ońaıǵa soqpady, bul proses tym uzaqqa sozyldy. Mılısıa rektorattan burynǵy stýdentter men oqýdan shyǵarylǵandardyń tizimin alyp, egjeı-tegjeıli zertteıdi. Ýnıversıtet oqytýshylary men qyzmetkerlerine deıin kúdikke ilinedi. İz kesýshiler 7000-ǵa jýyq medısınalyq kartany tekserip shyqqan.
Bir nárse anyq edi – qylmysker ýnıversıtet mańaıynda turady jáne onyń avtokóligi joq.
Tipti, polısıa mynadaı qıturqy áreketke barǵan. Mılısıanyń bes qyzmetkeri áıeldershe kıinip, betterin árlep, ýnıversıtet mańaıynda serýendep júrgen. Alaıda qylmysker bul tuzaqqa da túspeıdi.
Bir kúni mılısıa qyzmetkerleri kezekti bir qurbannyń máıitin oqıǵa ornynda tekserip jatqan kezde syrttarynan baqylap turǵan er adamdy baıqaıdy. Ol buryn «zorlaý» babymen sottalǵan Sergeı Manjıkov degen azamat edi. Alaıda onyń qan toby qylmyskerdikimen sáıkes kelmegendikten, mılısıa Sergeıdi kúdikti retinde qarastyra almaıdy.
Birneshe kún ótken soń S. Manjıkov polısıany óziniń turǵylyqty jerine shaqyryp, bir jaǵymsyz ıistiń mazalaıtynyn aıtady. Onyń úıine barǵan quqyq qorǵaý qyzmetkerleri eshqandaı ıis shyqpaıtynyn anyqtap, Manjıkovtyń aqyl-esi kem degen oıǵa keledi.
Osy ýaqyt aralyǵynda taǵy bir qylmys bolady. Ádettegideı, taǵy bir qyz zorlanyp, óltirilgen. Biraq eshqandaı aıǵaq tabylmaıdy.
Sóıtip júrgende polısıaǵa bir jup habarlasady. Olardyń aıtýynsha, belgisiz er adam ekeýine shabýyl jasaǵan. Kezdesýge keshigip kelgen jigit óziniń qurbysyna bireýdiń tıisip jatqanyn kórgen. Sol jerde tóbeles bastalyp, qylmysker jigitti pyshaqtap, qashyp ketken. Jábirlengen qyz ózine shabýyldaǵan er adamdy sýrettep bergende polısıa ony birden tanıdy. Qylmysker – mılısıanyń kóz aldynda júrgen Sergeı Manjıkov edi.
Onyń meken-jaıyn biletin tártip saqshylary qylmyskerdi birden úıinde tutqyndaıdy. Basynda óziniń kinásin moıyndamaǵan ol tek qan toby qylmyskerdikimen sáıkes kelgennen keıin ǵana barlyq shyndyqty jaıyp salady.
Manjıkovtyń qan toby II emes, III bolyp shyqqan. Qate jasalǵan birinshi saraptamanyń kesirinen taǵy bir qyz qurban boldy.
Qanisherdiń úıinde tintý júrgizgen mılısıa qyzmetkerleri ólgen qyzdardyń zattaryn tapqan. Qylmysker, tipti, óz qurbandarynyń áshekeılerin ápkelerine, súıiktisine syılaǵan.
Sot otyrysynda qylmysker keshirim surap jylap, tizerlep turyp jalbarynǵan kórinedi. Alaıda sot ony ólim jazasyna kesedi. Sergeı Manjıkov 1993 jyly Almatydaǵy № 1 tergeý abaqtysynyń podvalynda atyldy.
