Resmı derek boıynsha Reseıdiń Kemerovo qalasyndaǵy órtte 64 adam kóz jumdy delinedi. Bul shyndyqqa janasa ma? Áleýmettik jelide qurban bolǵandardyń sanyna qatysty ártúrli áńgime aıtylyp jatyr.

27 naýryzda myńdaǵan adam alańǵa shyǵyp, narazylyq bildirdi. Jergilikti turǵyndar gýbernator Aman Tóleevti qyzmetinen bosatyp, shyndyqty jasyrmaı, qurbandardyń naqty sanyn aıtýdy talap etti.

«64 adam qaza tapty degen derek – ótirik! Demalys kúni bir zalda otyz adam ǵana boldy degenge kim senedi? Saýda ortalyǵynyń barlyq zaldary lyq toldy, bir zaldyń ózinde 142 oryn bar. Qansha bılet satyldy, qansha adam japa shekti?» - dep shýlasty.

Reseıdegi keıbir azamattyq belsendiler qaıtys bolǵandar sany resmı habarlanǵannan áldeqaıda kóp ekenin aıtady. Áleýmettik jelilerde osyǵan baılanysty neshe túrli fotolar men vıdeolar tarap ketken. Mysaly, Youtube jelisinde taraǵan myna materıalda órttiń kesirinen 400-ge jýyq adam qaıtys boldy delinedi.

Sonda bul qalaı bolǵany? Reseı bıligi órtten qaza tapqandardyń sanyn ádeıi kemitip kórsetip otyr ma?

Evgenıa Volnova esimdi ýkraınalyq pranker 25 naýryzda Kemerovodaǵy máıithanaǵa qońyraý shalǵan. Ózin Tótenshe jaǵdaılar komıtetiniń adamy retinde tanystyryp, qansha bos oryn baryn suraǵan. Shamamen 70 oryn bar ekenin bilgen soń, qaza tapqan adamdar sany 300-ge jýyq dep eseptep shyǵarypty.

Sonymen qatar ýkraınalyq pranker «Zımnáá vıshná» saýda ortalyǵynda basqa da quıtyrqy áreketter jasap, ony vıdeoda jarıalaǵan.

RF prezıdenti Vladımırovıch Pýtın áleýmettik jelilerdegi tekserilmegen aqparattarǵa senbeýge jáne resmı derekterge esh kúmán keltirmeýge shaqyrdy.

Alaıda jaýapty organdarǵa nanbaǵan bir top belsendi máıithanaǵa baryp, qurbandardy ózderi sanaýǵa kirisken. Máıithananyń qýys-qýysyn tintip shyqqan olar 64 adamnyń múrdesin kóripti.

Eske salaıyq, 25 naýryzda Reseıdiń Kemerovo qalasyndaǵy «Zımnáá vıshná» saýda ortalyǵynda alapat órt bolyp, ǵımarat otqa orandy. Resmı derekter boıynsha 64 adam qaza tapqan, onyń kópshiligi – balalar.