QR mádenıet jáne sport mınıstri Arystanbek Muhamedıuly jeńil júristi qyzdardy qamshymen sabaǵan belgili reper Jan Ahmadıevtiń beıneklıpine qatysty túsinikteme berdi, dep habarlaıdy Qamshy.kz aqparat agenttigi Sputnik Qazaqstanǵa silteme jasaı otyryp.

"Eger biz barlyq jaǵdaıdy jasaǵanda, ol qyzdar kóshede turmaıtyn edi. Biz, kerisinshe, olardyń óz mamandyqtarymen aınalysýyna kómektesýimiz kerek. Mundaı jaǵdaıdyń kópshilikke taraǵany ókinishti-aq árıne. Múmkin ol (reper – avtor eskerp.) óziniń atyn shyǵarǵysy kelgen shyǵar. Onyń ornyna sol qyzdarǵa jaqsy jumys taýyp bersin, jaǵdaı jasasyn", — dep keńes berdi mınıstr "Jas Otan" jastar qanatynyń IV sezinen keıin. 

Muhamedıuly reperdi jazalaý-jazalamaý quqyq qorǵaý organdarynyń quzyretindegi másele ekenin atap ótti. 

"Men azamat retinde múlde qoldamaımyn", — dedi mınıstr. 

Eske salyp ótsek, "Qazaqpyz ǵoı" YouTube-arnasynda "jezókshelerdi qamshymen qýyp júrgen" reperdiń vıdeosy jarıalandy. Beınejazbada Jan Ahmadıev qalany aralap júrip, joldyń shetinde turǵan jezókshelermen sóılesedi. Áńgime barysynda ol kenetten qamshy alyp shyǵyp, qyzdardyń birin sabaı bastaıdy.