2018 jylǵy 30 naýryzda Astana qalasynda Qazaqstan Respýblıkasynyń Memlekettik hatshysy Gúlshara Ábdiqalyqovanyń jáne Qazaqstan Respýblıkasy Ortalyq saılaý komısıasynyń tóraǵasy Berik Imashevtiń tóraǵalyq etýimen QR Prezıdenti janyndaǵy áıelder isteri jáne otbasylyq-demografıalyq saıasat jónindegi ulttyq komısıasy men Ortalyq saılaý komısıasynyń birlesken otyrysy ótti, dep habarlaıdy Qamshy.kz aqparat agenttigi.
Otyrysqa QR Parlamentiniń depýtattary, Áıelder isteri jáne otbasylyq-demografıalyq saıasat jónindegi ulttyq komısıa, Ortalyq saılaý komısıasy músheleri, Astana qalasyndaǵy EQYU Baǵdarlama ofısi, «BUU-áıelder» syndy halyqaralyq uıymdardyń ókilderi, QR Parlamenti Májilisine engen saıası partıalardyń jetekshileri, sondaı-aq, selektorlyq rejımde oblystar, Astana jáne Almaty qalalarynyń áıelder isteri jáne otbasylyq-demografıalyq saıasat jónindegi ulttyq komısıa men aýmaqtyq saılaý komısıalarynyń jetekshileri qatysty.
Otyrystyń ashylýynda sóılegen sózinde, Gúlshara Ábdiqalyqova Elbasynyń «Bes áleýmettik bastamasynyń» áıelder qoǵamdastyǵyna úlken ımpúls bergenin atap ótti.
- Prezıdent N.Nazarbaevtyń «Tórtinshi ónerkásiptik revolúsıasy jaǵdaıyndaǵy jańa múmkindikter» joldaýynda jáne «Rýhanı jańǵyrý» baǵdarlamalyq maqalasynda kórsetilgen maqsattardyń oryndalýy - áıelder uıymdarynyń belsendi qatysýyn talap etedi, - dedi Memlekettik hatshy.
QR Ortalyq saılaý komısıasynyń tóraǵasy Berik Imashev Komısıada saılaý prosesterinde genderlik aspektilerdiń qarastyrylǵanyn, sondaı-aq, 2016 jylǵy máslıhat saılaýy kezeńinde áıelderdiń usynylý, tirkelý, tirkeýden alyp tastaý sebepteri jáne saılanýy jóninde jáne 2016-2018 jyldar aralyǵynda ótken shyǵyp qalǵandar ornyna ótkizilgen tórt saılaý kampanıalary boıynsha taldaý júrgizilgenin aıtty.
QR OSK basshysy saılanbaly laýazymdarǵa óz kandıdatýralaryn usynǵan áıelderdiń daıyndyqtarynyń uqyptylyǵyn, saılaý zańnamasynyń sharttaryn oryndaýyn jáne kóp jaǵdaıda jeńiske jetetinin atap ótti.
Sonymen birge, B.Imashev, mundaı otyrystar Ortsaılaýkomǵa saılaýdy uıymdastyrýshy retinde saılaý qorytyndylaryn taldaý jasaýǵa, jáne saılaý prosesteriniń qatysýshylarymen, sonyń ishinde saıası partıalarmen, talaqylaýǵa múmkindik beredi.
Otyrys barysynda QR OSK tóraǵasynyń orynbasary K.Petrov, QR OSK múshesi L.Súleımen, QR Memlekettik qyzmet jáne jemqorlyqqa qarsy agenttiginiń tóraǵa orynbasary A.Shaımova, «Nur Otan» partıasynyń hatshysy F.Qýanǵanov, QKHP Ortalyq komıtetiniń hatshysy, Parlament Májilisiniń depýtaty A.Qonyrov, «Aq jol» demokratıalyq partıasy tóraǵasynyń orynbasary, Parlament Májilisiniń depýtaty E.Nıkıtınskaıa jáne basqalary sóz sóıledi.
Otyrys barysynda áıelderdiń memlekettik qyzmette jáne saılanbaly organdarda sheshim qabyldaý deńgeıindegi ókildigi boıynsha statısıkalyq maǵlumattar aıtyldy. Barlyq memlekettik qyzmetkerlerdiń 55 %-yn áıelder quraıdy. Basshylyq qyzmettegi áıelder úlesi - 39,5%, onyń ishinde joǵarǵy basshylyq qyzmette - 29%. Bul san EYDU-nyń ortasha kórsetkishine saı keledi. Qostanaı oblysy máslıhattarda (31%) jáne basqa da memlekettik organdarda (61%) áıelder sany boıynsha kósh bastap keledi.
