Hannan basqa qazaqta qorǵan bar ma? Qyzyr qonbas halqyna or qazǵanǵa, Deshti Qypshaq dalasy dúr silkindi, Ábilhaıyr bılikti qolǵa alǵanda. Meıli týys bolsań da bir taptaǵy, Kimdi aıaǵan tarıhtyń urtoqpaǵy. Qan tógisti taq úshin Shyńǵys hannyń, Shynjyr balaq, shubar tós urpaqtary. Halyq tozar han azsa, aıdan anyq Panalaıdy qarasha qaıda baryp. Túre kóshti túmen el Moıynqumǵa, Jánibek pen Kereıdi saılap alyp. Kóshken halyq Jer Uıyq - abatty izdep, Ábilhaıyr qolynan azatpyz dep, Tulparsazda Kereıdi han kóterdi Jarıalap ózderin QAZAQpyz dep. Shaıbanı men qyryq jyl qyrqysqanda, Namys oty shyqqanda yrshyp qanǵa. Qaıta oralý halyqtyń armany edi, Tórt qaqpaly, kıeli Túrkistanǵa. Jyldar ótti, Táńirdiń jazǵany bop, Jas ulystyń qashanda armany kóp. Astrahanda, aq ıyq aq saraıda, Májiliste otyrdy Áz Jánibek. -İrgesi bekip handyqtyń, aımaǵy keńip Deshti Qypshaqty qazaǵym jaılady kelip. Ulystyń qara shańyraǵyn kóterdik mine, Kereı joq, átteń, shashaqty baıraǵym edi. Handar tartysy janyma jaradaı batyp, Tóńkeristerden shaldyqty sharadaı basym. Orys pen oırat tus-tustan enteleı enip, Shynymen shortan shala ma qaraǵaı basyn. Jaqynyń kózge kólgirsip, jat aldaıdy da, «Jer Uıyq» halyq qolymen jasalmaıdy ma? Qalaı etkende ornaıdy ádildik elde? – Jánibek saýal tastady Asan Qaıǵyǵa. Oılaǵan halyq qamyn Asan Qaıǵy, /Beınesi erikkennen qashalmaıdy/ Ańyz ǵyp armandaǵy Jer Uıyqty Aıtqan el maýqyn áli basa almaıdy. Asyl sóz tereń oıdyń túkpirinde, Álemdi sharlap, sholyp qutty kúnde, Sher qozǵap, kóńil kóli tolqyǵanda Jaryqtyq sóıledi eken qus tilinde. Jarasqan danyshpanǵa tózimdilik, Aıtatyn urpaǵyna sózin bilip, Ǵalamnyń túkpirinen shúlen tartyp, Ún-túnsiz otyrdy uzaq kózin jumyp. Bir sátte, jelpinetin kezi kelip, Turǵandaı bolashaqty kózi kórip, Jalǵannyń joryǵandaı qupıasyn, Qart abyz sóılep ketti tebirenip. - Han Iem! Aıtsam sózimnen tamady nala, Qaltarys qaldy kózińnen jaraly dala. Qalyń qazaqtyń qamy emes oılaǵandaryń, Mansapqorlardyń ashylǵan arany ǵana. Qashan da hanǵa meıirim ólshenip bergen, Alshaqtaý bolsyn peıiliń qantógisterden. Bir jeńnen bilek shyǵarǵan qarashań bolsa, Jaýdan da qorǵap qalady belsenip kelgen. Jaralap soǵys janyńdy, tunshyqsa dala, Jendetke berme jaýyńdy qyrsyqqa bola. Óletin taıǵa talasyp, qonatyn saıǵa, Jaqynyńmenen jaýlasyp jyrtyspa jaǵa. Jumaq joq jattyń qolynan tartyp alatyn, Atan túıeniń qomyna artyp alatyn. Jer Uıyq seniń OTANYŃ - altyn oshaǵyń, Ýyzdaı uıyp otyrǵan alty Alashyń. Halqyna ısin, mastanbaı, ulyq ta basyn, Ústine qoıdyń boztorǵaı jumyrtqalasyn. Tek sonda ǵana jasqanbaı basasyń jerdi... ...Tebirenip Asan hanyna batasyn berdi. Solyǵyn, osyny aıtyp, basty babam, Ádil sóz han aldynda baq synaǵan, Eldigin elestetip qazaǵymnyń, Qulpyryp Jer Uıyqtaı jatty ǵalam. R.S. Ataly sózden meniń de tazaryp qanym Handardyń ashqan uǵyndym ǵajaıyptaryn. Úsh júzdiń basy qosylsa bir shańyraqqa, Úsh násilge de jat emes Qazaqstanym. Oıanǵan beıbit tirshilik, taranyp tańda «Jer Uıyq» kórdim qolyma qalam ustarda. Joldardyń bári jetkizse máńgi Úrimge, Armannyń bári jetkizer Qazaqstanǵa. Qasym BOTANOV, Temirtaý qalasy
