Forbes Kazakhstan jýrnaly men Ratel.kz saıtynyń Almatydaǵy redaksıadaryn 2 sáýirde tintigen soń ustalǵan jýrnalıser bosatyldy.

Ratel.kz saıtynyń bas redaktory Marat Ásipov, bas redaktordyń orynbasary Sapa Mekebaev jáne jýrnalıs Anna Kalashnıkova dúısenbi kúni keshke ishki ister departamentindegi tergeýden shyqty. Bul týraly Ratel.kz jýrnalısi Vadım Boreıko Facebook-tegi paraqshasynda habarlady. Onyń aldynda Forbes Kazakhstan jýrnaly bas redaktorynyń orynbasary Aleksandr Vorotılov bosatylǵan.

Jýrnalıserdi redaksıadaǵy tintýden soń ustaǵan edi. Almaty polısıasy bul áreketin eki aqparat quraly «ádeıi jalǵan málimet taratady» delingen «azamat K» aryzymen baılanystyrdy. «Azamat K» - burynǵy memlekettik kirister mınıstri, kásipker Zeınolla Kákimjanov, deıdi BAQ qyzmetkerleri. Kákimjanov ótken jyly atalǵan basylymdarmen sottasyp, olardan 50 mln teńge óndirý shaǵymyn jeńip shyqqan. Kákimjanovtyń jemqorlyq sqemasyn áshkerelemek bolǵan jýrnalıser sottyń bul sheshimimen kelispedi.

Polısıa Forbes Kazakhstan redaksıasyn tintigen soń, Vorotılovtyń jumys kompúterin alyp ketti. Ótken aptada buǵattalǵan Ratel.kz saıtynyń redaksıasynan da kompúterler men qujattar alynǵan.

Kákimjanov Facebook áleýmettik jelisindegi paraqshasynda ózine qarsy maqalalardy «tapsyryspen jazylǵan» dep atady.