Semeıde júk kóligi 2 oqýshyny qaǵyp ketti. Aýyr jaraqat alǵan 7 synyptyń qos oqýshysy aýyr halde aýrýhanaǵa jetkizildi, dep habarlaıdy Qamshy.kz aqparat agenttigi QazAqparattyń deregene súıenip. Oqys oqıǵa búgin saǵat 14.00-de Qarjaýbaıuly kóshesinde bolǵan.

12 jastaǵy qyzdar jaıaý júrginshilerge arnalmaǵan jerden ótip ketpekshi bolǵan.  Alaıda qatty jyldamdyqpen kele jatqan 49 jastaǵy kólik júrgizýshisi tejegishti basyp úlgermeı, qos qyzdy qaǵyp ketken. Qazir  qyzdar jansaqtaý bóliminde aýyr jaǵdaıda jatyr.  

«Eki oqýshynyń da jaraqaty aýyr.  Olardyń bireýiniń bas súıgi synyp, mıyna qatty soqqy tıgen. Al ekinshi qyzdyń da bas súıegine qatty zaqym kelgen.  Mıy shaıqalyp, basqa da jerleri synǵan. Qazir ekeýi de jansaqtaý bóliminde jatyr», -dedi  Semeı qalasynyń Jedel medısınalyq járdem stansıasynyń aǵa dárigeri Armangúl Smaǵulova.

Semeı qalalyq İİB-nyń aqparatyna qaraǵanda, bul fakti boıynsha qazir júrgizýshi ústinen  Qazaqstan Respýblıkasynyń Qylmystyq kodeksiniń 345-babynyń 2-bóligi boıynsha  is qozǵalǵan.  Tergeý jumystary bastalyp,  tıisti saraptamalar taǵaıyndalǵan.

Aıta keteıik, kólik apaty bolǵan jerde jyldamdyqty 40 km/s-ǵa deıin tómendetý talaby bar. Sebebi, joldyń jıeginde № 3-shi mektep ornalasqan.