Eńbek jáne halyqty áleýmettik qorǵaý vıse-mınıstri Nurjan Áltaev «oralman» termıninen bas tartý týraly sheshimdi qabyldaýy tıis arnaıy komısıanyń jumysy jaıly málimdedi, dep habarlaıdy Qamshy.kz aqparat agenttigi. 

«Oralman» termınine qatysty halyq ta, depýtattar da túrli usynystar aıtty. Qazirgi ýaqytta saraptama júrgizilýde. Keı memleketterde oralmandardy otandastar dep ataıdy, keıbiri ózge termınderdi qoldanady. Saraptamanyń qorytyndysy boıynsha biz sheshim qabyldaımyz. Negizinen «otandas» termınin qarastyryp jatyrmyz. Arnaıy komısıa kerekti jumystardy júrgizýde. Sheshim qabyldanǵan soń sizderge nátıjesin aıtamyz. Táýelsizdik jyldardan beri Qazaqstanǵa bir mıllıonǵa jýyq oralman kóship keldi. Qatelespesem, olardyń kóbi Ózbekstannan kelgen. 2018 jyly elge 18 myń 605 oralman oraldy», - dedi Áltaev jumyspen qamtý jáne kóshi-qon salasyndaǵy zańnamaǵa ózgerister engizý týraly zań jobasyn talqylaý barysynda.

Buǵan qosa vıse-mınıstr Qazaqstandaǵy otbasy joq oralmandarǵa qatysty máseleni de tilge tıek etti.

«Oralmandarǵa beriletin óńirlik kvotalardy tek otbasyly adamdarǵa emes, jalǵyz basty oralmandarǵa da berý máselesin qarastyryp jatyrmyz. Zańnamaǵa sáıkes, kvota otbasyly oralmandarǵa beriletin. Búginge deıin tolassyz kelgen ótinishterge sáıkes, otbasy joq oralmandarǵa da kvota berý máselesi qaraldy. Endi kvota jalǵyz qonys aýdarǵandarǵa da beriledi», - dedi Áltaev.