2018 jyldyń 5 sáýirinde QAZAQ BATYRY jekpe-jek Akademıasynda QR Grepplıng Qaýymdastyǵynyń Prezıdenti Qanat Alın kóktemgi sport maýsymyna josparlaǵan jobalarymen bólisti. Sonymen qatar, qysqy maýsymda jetken tolaıym jetistikterine de toqtala ótti.
Biregeı sport túri elimizde qarqyndy damý ústinde. Qaýymdastyq bul sport túrine degen mahabatty mektep tabaldyryǵan bastap uıalatýdy kózdep otyr. Álemdik tájirıbelerdi zertteı kele Grepplıng Qaýymdastyǵy “Mektep lıgasy” QB birlesip «School Grappling League» jobasyn júzege asyrýda. Búginde «Bilim - ınovasıa» lıseı bazasynda Astana jáne Qostanaı qalalarynda fakúltatıvti sabaqtar ashyldy. Jaqynda sporttyq uıym Astana qalasy Saryarqa aýdanynyń ákiminen qoldaý alǵan bolatyn. Jalpy bilim berý mekemelerinde endi tegin grepplıng seksıalary belsendi túrde ashyla bastaıdy. Baspasóz konferensıasy barysynda Qaýymdastyq basshysy Qanat Tóleýbekuly men «Mektep lıgasy» qoǵamdyq uıymynyń tóraǵasy Nurlan Irgızbaev yntyqmaqtastyq jóninde memorandýmǵa qol qoıdy.
Elimizde grepplıngtiń shynymen de qarqyn qosqandyǵy baıqalady. Aımaqtardaǵy qyzýǵýshylyq kúnnen kúnge artyp keletini de jasyryn emes. Qanat Alınniń aıtýy boıynsha: «QR Grepplıng Qaýymdastyǵynyń basty maqsaty – qazaqstandyqtardy ata-babalarymyzdyń qaldyrǵan ulttyq qundylyqtaryn saqtaı otyra rýhanı jáne fızıkalyq turǵyda damytý. Elbasynyń syńdarly saıasatynyń arqasynda bizdiń el grepplıngten álem chempıonatyn Astana qalasynda ótkizý múmkindigine ıe boldy. Qaýymdastyq óz kezeginde, 6-9 qyrkúıek kúnderi ótetin aıtýly dodaǵa daıyndyǵyn bastady».
Qysqy maýsymdy Qaýymdastyq halyqaralyq «Astana Open 2018» týrnırimen bastady. Astana qalasynda ótken báıgege álemniń alty elinen kelgen 600 astam sportshy qatysty. Qazaqstan, Reseı, Grýzıa, Ózbekstan, Qyrǵyzstan men Úndi elderi jyldyń basty dodasynda baqtalasty. Aıta ketý kerek, atalmysh halyqaralyq týrnır qatarynan úshinshi ret uıymdastyrylyp otyr.
Kelesi kezekte Jastar Saraıynda eresekter jáne ardagerler arasynda 10-11 aqpan kúnderi aralyǵynda Astana qalasynda ótken grepplıngten Qazaqstan Respýblıkasynyń chempıonaty. Jarysqa elimizdiń barlyq aımaqtarynan 500-ge jýyq sportshy qatysty. Týrnır nátıjesine sáıkes Ulttyq qurama jasaqtaldy. Aıta keteıik, bul joly da otandastarymyz qorjynymyzdy altynǵa toltyrdy.
Qazaqstan Ulttyq quramasy grepplıngten Bishkekte ótken Azıa birinshiliginde 30-dan astam medal (12 altyn, 12 kúmis jáne 9 qola) jáne birinshi jalpy komandalyq oryndy qanjyǵasyna baılady. Qazaqstandyqtar negizgi qarsylastary – týrnır qojaıyndary Qyrǵyzstandy (2 oryn) jáne Iran quramasyn qapy qaldyrdy. Esterińizge sala keteıik, 5 naýryzda Qyrǵyzstan astanasy Bishkekte erler jáne áıelder arasynda grepplıng jáne grepplıng gıden Azıa chempıonaty ótti. Atalmysh birinshilik alǵash ret UWW Dúnıejúzilik kúres Qaýymdastyǵynyń erejesine sáıkes Olımpıada januıasyna kiretin grek-rım, erkin jáne áıelder kúres túrlerimen qatar uıymdastyryldy. Ótken jyly Astana qalasynda Azıa chempıonatynda bizdiń palýandar qyryqtan astam medaldi qanjyǵalaryna baılap birinshi orynǵa ıe bolǵan edi. Dál osylaı Qazaqstan Azıa kontınentinde úzdik ekendigin ekinshi márte dáleldeı tústi.
1 sáýir kúni QAZAQ BATYRY KIDS týrnıri uıymdastyryldy. Qazaqstandyq balalar kileminde asa úlken suranysqa ıe jarysqa eki júzden astam 4-ten 11 jasqa deıingi kishkentaı palýandar qatysty. Al 7 jáne 8 sáýir aralyǵynda Jastar Saraıynda balalar, jastar jáne ıýnıorlar arasynda QR chempıonaty ótedi.
Baspasóz konferensıasy barysynda Qaýymdastyq derekti fılmder legimen tanystyrdy. Jarystar barysynda túsirilgen beınematerıaldar sport súıer qaýym ǵalamtor jelisinen jaqyn ýaqytta tamashalaı alady. Sporttyq uıym bul baǵytta áli de talaı jumys isteý kerek ekendigin jasyrmady. Jastardy sportqa baýlý jáne yntalandyrý - búginge qoıyp otyrǵan basty maqsat.
