Aqtóbe qalasyndaǵy qylmystyq-atqarý júıesi mekemesinde ázirlengen  500-den astam biregeı buıymdar «Serpin» jármeńkesinde usynyldy, dep jazady Qamshy.kz aqparat agenttigi Aqtóbe qalasy ákimdiginiń baspasóz qyzmetine silteme jasaı otyryp.

Aqtóbede alǵash ret ótkizilip otyrǵan sharaǵa oblys ákimi Berdibek Saparbaev qatysty.

– Memleket basshysynyń tapsyrmasyna sáıkes sottalǵan azamattardyń qalypty ómirge qaıta oralýyna barlyq jaǵdaıdy jasaýymyz kerek. Bizdiń oblysta túzeý mekemelerinde eki kolej bar, onda 150-den astam sottalǵandar jumysshy mamandyqtar boıynsha bilim alady. Osylaısha, biz olarǵa túzetý jolyn tańdap, óz otbasylaryna aqsha tabýǵa, kómektesýge, qarjylyq mindettemelerin tóleýge, sondaı-aq shaǵyn jáne orta bıznesti damytýǵa múmkindik beremiz, - dedi B.Saparbaev.

Búgingi kúni Aqtóbe oblysynyń túzeý mekemelerinde 1500-den astam adam jumys isteıdi, olardyń 554-i «Eńbek-Aqtóbe» fılıalynda jumys jasaýda.

«Eńbek» RMK bas dırektorynyń orynbasary Marat Salınniń aıtýynsha, tek ótken jyly memlekettik kásiporyn 1,3 mlrd teńge somasynda salyq tóledi. Respýblıkada barlyǵy 4000 tutqyn jumys isteıdi. Ortasha jalaqy shamamen 35 myń teńgeni quraıdy.

Jármeńkede aǵash jáne metal, qurylys materıaldary men tigin ónimderiniń júzdegen túrleri bar. Úıge qajetti turmystyq kıim-keshek pen kádesyılar, kartınalar, qobdıshalar, nardy, shahmattar usynyldy. Osynyń bári sottalǵandardyń qolymen jasalyp, kúndelikti ómirde paıdalanýǵa jaraýda.

Budan basqa, is-shara aıasynda «Eńbek-Aqtóbe» fılıaly men jergilikti kásipkerler arasynda 35 mıllıon teńgeden astam somaǵa yntymaqtastyq týraly barlyǵy 60 memorandýmǵa qol qoıyldy.