Almaty qalasyndaǵy Radıoelektronıka jáne baılanys áskerı-ınjenerlik ınstıtýtynyń bazasynda TMD memleketteriniń joǵary áskerı bilim berý uıymdary kýrsanttarynyń matematıka páninen IV halyqaralyq olımpıadasy óz máresine jetti, dep habarlaıdy Qamshy.kz aqparat agenttigi REjBÁII baspasóz qyzmetine silteme jasap.

Halyqaralyq olımpıadaǵa Qazaqstan, Armenıa, Belarýs, Qyrǵyzstan, Ózbekstan, Tájikstan jáne Reseı Federasıasynyń komandalary qatysty.

TMD qatysýshy memleketterdiń Qorǵanys mınıstrleri keńesiniń tóraǵasy – Reseı Federasıasynyń Qorǵanys mınıstri armıa generaly S.Shoıgý men Qazaqstan Respýblıkasynyń Qorǵanys mınıstri general-polkovnık S.Jasuzakov atalǵan bilim saıysyna tikeleı jetekshilik etken. Olımpıadanyń basty maqsaty – áskerı oqý oryndarynda ofıserlik quramnyń sapaly daıyndyǵyna jiti kóńil bólý, áskerı mamandardy sapaly daıyndaý, kásibı deńgeıde yntalandyrý, ǵylymı jáne shyǵarmashylyq qabiletterin arttyrý, oqytýshy-professorlar quramynyń kásibı deńgeıin kóterý, dáris berýdiń ádistemesin jetildirý jáne de joǵary áskerı oqý oryndary arasynda sapaly báskelestik qurý.

Sonymen qatar, olımpıada aıasynda halyqaralyq ǵylymı –tájirbıelik konferensıa ótkizildi. Konferensıa jumysyna TMD qatysýshy elderiniń áıgili ǵalymdary men oqytýshylary, áskerı JOO-nyń kýrsanttar komandalarynyń jetekshileri qatysty. Konferensıa barysynda áskerı bilim jáne ǵylymnyń jaı-kúıi, TMD memleketterdiń áskerı JOO-da jaratylystaný, ǵylymı jáne ınjenerlik pánderdi oqytý máseleleri keńinen talqylandy. Sondaı-aq, profesorlyq-oqytýshylar quramy men kýrsanttardyń ǵylymı qyzmet salasynda oryn alǵan ózekti máseleler qarastyryldy.

– Radıoelektronıka jáne baılanys áskerı-ınjenerlik ınstıtýtynyń kýrsanttary ekinshi jyl qatarynan 2 oryndy ıelenip otyr. Buǵan qosa, TMD memleketteriniń joǵary áskerı bilim berý oqý oryndary arasynda aǵylshyn tilinen İV halyqaralyq olımpıadasynda bizdiń kýrsanttar 3 orynǵa qol jetkizgen bolatyn. Bul ınstıtýt qabyrǵasynda eńbek etip júrgen oqytýshy-professorlar quramynyń kásibı sheberlikteriniń aıqyn dáleli, - dep atap ótti áskerı oqý ornynyń basshysy polkovnık Asqar Mustabekov.

TMD memleketterinen jınalǵan kýrsanttar 3 kezeńnen turatyn matematıkalyq saıysta baqtaryn synady. Absalúttik komandalyq birinshilikte 1 oryndy Reseı Federasıasy ıelendi, 2 orynda Qazaqstandyq komanda, al 3 oryn Ózbekstan komandasyna buıyrdy.