Aqmola oblysynda týǵan bólesiniń qolynan mert bolǵan jigittiń ólimine qatysty sot jalǵasyp jatyr. Al marqum Abylaı Shyńǵysovtyń týystary bul iske bes adamnyń qatysy bolsa da, aıyptalýshy oryndyǵynda bireýi ǵana otyr deıdi. Olar qazir basqalarynyń bostandyqta júrgenine narazy, dep habarlaıdy Qamshy.kz aqparat agenttigi KTK saıtynyń deregin  negizge alyp. 

Qaıǵyly jaǵdaı ótken jyldyń jeltoqsan aıynda Krasıvoe aýylyndaǵy úıde bolǵan. Qazir ol úıde eshkim turmaıdy. Óńirde asabalyq ónerimen tanylǵan Abylaı Shyńǵysovty dál 30-ǵa tolǵan  týǵan kúninde óz úıinde óltirip ketken. Tańǵa jýyq shyrt uıqyda jatqan otbasynyń shyrqyn buzǵan onyń týǵan bólesi eken. Sol túnde  jıenińmin degen soń, naǵashy apasy Záýresh esh jamandyq oılamaı esikti ashypty. Onyń aıtýynsha, qoldarynda temir súımen, aǵash ustaǵan 4 jigit kirip kelip, uıqyda jatqan ulyn ura bastaǵan.

«Bizdi jibermeı, ekeýmizdi qaıta-qaıta esik aldyna laqtyryp tastaıdy. Óltirdi, óltirdi dep aıǵaılap jatyrmyn. Balalar bári shyńǵyryp jylap jatyr. Bireýi ǵana otyr moınyna alǵan. Tórteýi birdeı úıge kirdi. Uryp, súırelep alyp shyqty», — deıdi marqumnyń anasy Záýresh Shyńǵysova.

Sol kúni Abylaı dostarymen týǵan kúnin atap ótken. Anasynyń aıtýynsha, úıge masań kúıde oralypty. Sol kúni bólelerdiń arasynda bir-birin araqqa jumsap, sol úshin  kıkiljiń bolǵanyn keıin estigen. Biraq túkke turǵysyz dúnıege bola 2 bólesiniń jigittermen kelip adam óltirýi mıǵa syımaıdy,-deıdi anasy. Qazir otbasy bostandyqta júrgenderden qorqyp ári qandy qylmystyń kýágeri bolǵandyqtan úıdi tastap ketken. 

«Eki bala mine, kishkentaı kórip tursyzdar. Solar úshin qorqyp,qashyp ketýdi oıladyq. Qazir Qostanaıda týystardyń úıin jaǵalap júrmiz. Óıtkeni úıimiz joq basymyzda», — deıdi marqumnyń áıeli Aqbota Myrzahmetova.

Marqumnyń týystarynyń ashýyn keltirip otyrǵany da osy jaǵdaı ǵoı. Negizi, Abylaıdy syrtta qalyp qoıǵan besinshi adam, ıaǵnı jańaǵy bólesi óltirgen kórinedi. Al qalǵan tórteýdiń úsheýi jeńildeý bap boıynsha tergelip jatyr eken.

«Qazirgi ýaqytta ol 3 kúdiktige qatysty «Turǵyn-jaıǵa adamnyń erkinen tys basyp kirý» baby boıynsha qylmystyq is qozǵaldy. Olar 2 jylǵa deıin bas bostandyǵynan aıyrylýy múmkin. Qazir  qolhatpen bostandyqta júr», — dep túsindirdi Aqmola oblystyq İİD baspasóz qyzmetiniń jetekshisi Gúlnár Pınchýk.

Al Krasıvoedegi qandy oqıǵany toptasyp kisi óltirý dep sanaıtyn jábirlenýshi tarap búgin prokýratýradan istiń qaıta tergelýin talap etti. Olar ádildikke jetpeı qoımaımyz deıdi. Aıta keteıin, bostandyqta júrgen tórteýdiń de bireýi marqumnyń bólesi eken.