Búgin Aqordada birqatar shet memleketterdiń Qazaqstandaǵy Tótenshe jáne Ókiletti elshileri QR Prezıdenti Nursultan Nazarbaevqa senim gramotalaryn tabystady, dep habarlaıdy Qamshy.kz aqparat agenttigi.
Elbasy RF-nyń Qazaqstandaǵy elshisi Alekseı Borodavkın, Ózbekstan elshisi Saıdıkram Nıazhodjaev, Túrkimenstan elshisi Toıly Komekov jáne Italıanyń Qazaqstandaǵy Tótenshe jáne ókiletti elshisi Paskýale D’Avınodan senim gramotalaryn qabyldady.
Shara barysynda shet memleketterdiń elshileri QR Prezıdentine senim gramotalaryn tabystaý úlken qurmet ekenin aıtyp, alǵystaryn jetkizdi.
Nursultan Nazarbaev, óz sózinde Qazaqstan shırek ǵasyr ishinde dıplomatıalyq júıesi ornyqqan, azamattyq qoǵamy kemeldengen, ekonomıkasy damyǵan memleketke aınalǵanyn basa aıtty.
«Qosh keldińizder! Barshańyzdy Qazaqstandaeǵy jańa dıplomatıalyq mısıalaryńyzdyń resmı bastalýymen shyn júrekten quttyqtaımyn. Jaýapty ári mártebeli mindetterińiz elderimizdiń arasyndaǵy yntymaqtastyqty odan ári damytýǵa serpin beredi dep senmin. Sizderdiń dıplomatıalyq qyzmetterińiz mazmundy ári mańyzdy oqıǵalarǵa toly kezeńderde bolǵaly tur. Qazaqstan shırek ǵasyr ishinde demokratıalyq júıesi ornyqqan, azamattyq qoǵamy kemeldengen, damyǵan memleketke aınaldy dep senimmen aıta alamyz. Qazaqstan halyqaralyq baılanystaryn damytý úshin kópjaqty syrtqy saıası baǵytyn jalǵastyra beretin bolady», - dep atap ótti Elbasy.
Sonymen qatar, Elbasy beıbitshilik pen qaýipsizdikti jáne halyqaralyq quqyq negizderin nyǵaıtýdy kózdeıtinin jetkizdi. Buǵan Qazaqstannyń BUU Qaýipsizdik Keńesiniń turaqty emes múshesi retinde atqaryp kele jatqan jumystarynyń nátıjesi dálel bola alatynyn da aıtyp ótti.
QR Prezıdentiniń aıtýynsha, Qazaqstan halyqaralyq kún tártibindegi ózekti máselelerdi, shıelenisterdi sheshýge óz úlesin qosyp kele jatyr. Olardyń biri – Sırıadaǵy jaǵdaıdy beıbit jolmen sheshý máselesi.
«Sırıadaǵy shıelenisti tarqatý isinde Astana prosesi mańyzdy rólge ıe bolyp, aıtýly sharalardyń birine aınaldy. Qazaqstan Eýrazıalyq ekonomıkalyq odaq, Shanhaı yntymaqtastyq uıymy, TMD, Ujymdyq jáne qaýipsizdik týraly shart uıymdarynyń is-qımyldaryna erekshe mán beredi», - dedi Nursultan Nazarbaev.
Sóziniń sońynda Elbasy shet elderdiń Qazaqstandaǵy elshilerine alǵys aıtyp, jumystaryna tabys pen sáttilik tiledi.
