QR Qarýly Kúshteri Áskerı polısıasy organdarynyń qurylǵanyna bıyl 21 jyl. Osyǵan oraı Taldyqorǵan garnızonynyń áskerı polısıa jasaǵynyń jeke quramyna merekelik buıryq oqylyp, qyzmet barysynda kózge túsken áskerı qyzmetshiler basshylyqtyń gramotalarymen marapattaldy. Saltanatty shara barysynda áskerı polısıa bóliminiń bastyǵy podpolkovnık Qaırat Júnispekov áskerı polısıanyń qurylýy men mindetterine arnaıy toqtalyp ótti.   

–Taldyqorǵan garnızonynyń áskerı polısıasy áskerı komendatýra men avtomobıl ınspeksıasynan bastaý alǵan. Bólim búginde QR Qarýly Kúshteriniń arnaıy áskerı qurylymdyq bólimsheleriniń biri bolyp tabylady. Qurylǵan kúnnen beri QR Konstıtýsıasyn, «Áskerı polısıa organdary týraly» QR Zańyn, sondaı-aq ózge de normatıvtik-quqyqtyq aktilerdi basshylyqqa ala otyryp óz jumysymyzdy tyńǵylyqty júrgizip kelemiz, – dedi podpolkovnık Q.Júnispekov.

Atalǵan qurylymdyq bólimshe QR Zańdarymen belgilengen quzyry sheginde qylmystar men quqyq buzýshylyqtardy anyqtaıdy, olardyń aldyn alady. Qylmys pen quqyq buzýshylyqtardyń saldarymen kúresip qana qoımaı, olardy jasaýǵa yqpal etetin jaǵdaılardyń sebebine úńilip, tergeý amaldaryn júrgizedi. Áskerı bólimdi óz betimen tastap ketken tergeý organdary men sottan jasyrynyp júrgen áskerı qyzmetshilerdi izdeýde de qarqyndy jumys atqaryp keledi.

Sonymen qatar, áskerı polısıa bólimi azamattardyń aryz-shaǵymdaryn qaraıdy, garnızondaǵy áskerı bólimder boıynsha tótenshe jaǵdaılar jaıly jedel aqparatty tirkep, ony taldaıdy.

Budan basqa zańmen belgilengen tártip boıynsha merzimdi jáne kelisimshartty áskerı qyzmetkerlermen, áskerı jıyn kezinde zapastaǵy azamattarmen, áskerı bólimder men mekemeler ishindegi azamattyq personalmen olardyń qyzmet atqarý barysynda nemese sol bólim ishinde jasaǵan qylmystaryn áshkerelep, tergeý amaldaryn júrgizedi.