Qazaqstanda azamattyq hal aktileri týraly anyqtamalar men kýálikterdi (týý týraly, qaıtys bolǵany týraly, nekeni tirkeý nemese ajyrasý týraly, sondaı-aq aty-jónin aýystyrý týraly kýálikter) qaıta alý merzimi 50-den 15 jumys kúnine deıin qysqartylmaq, dep habarlaıdy QazAqparat.

«Buryn týý týraly kýálikti qaıta alý úshin ózińiz dúnıege kelgen qalanyń HQO-syna ótinish berseńiz, 5 jumys kúni qajet bolatyn. Al, eger siz Qaraǵandy oblysy Qarqaraly aýdanynda týyp, Astanada tursańyz, daıyn qujatty 50 kúnge deıin kútýińizge týra kelgen», - dep jazdy Abylaıhan Ospanov Facebook-tegi paraqshasynda.

Onyń aıtýynsha, endi daıyn qujatty 15 jumys kúni ishinde alýǵa bolady.

«Biz Ádilet mınıstrligi men «Ulttyq aqparattyq tehnologıalar» AQ-daǵy áriptesterimizben birlesip, HQO Integrasıalanǵan aqparttyq júıesi men Azamattyq hal aktilerin tirkeý (AHAT) aqparattyq júıelerin biriktirdik. Osynyń arqasynda kýálikterdi nemese anyqtamalardy qaıta daıyndaýǵa berilgen ótinish HQO-dan týýy tirkelgen AHAT bólimine birden túsedi. Endi daıyn qujatty 15 jumys kúni ishinde alýǵa bolady. Biz bul merzimdi 5 jumys kúnine qysqartqymyz kelip otyr. Bul jańashyldyq Qazaqstannyń barlyq aýmaǵynda engiziledi», - dep túsindirdi memlekettik korporasıa basshysy.

Byltyr qazaqstandyqtar azamattyq hal aktileri týraly anyqtamalar men kýálikterdi qaıta alýǵa  328 239 ótinish bergen.