Astanada 14 jyl boıy sýret salýmen ǵana aınalysyp, tek sol óneriniń arqasynda kópten qalmaı, kóshke ilesip kele jatqan bir eńbekqor jigit bar. Ol – 1982 jyly dúnıege kelgen, Torǵaı óńiriniń týma talanty Estaı Seıdahmetov.

«Eńbek etken er kógerer» desek, «Eńbek kitapshasynsyz» da el qatarly ómir súrýge bolady eken. Mysaly, qylqalam ushynda qyryq qubylǵan boıaý arqyly kórkem sýret óneriniń barlyq janryn erkin meńgergen Estaıdyń árbir kartınasynyń quny búginde mıllıon teńgege deıin sharyqtap tur. Tapsyryspen salynǵan sýretteriniń ózi kólemi men taqyrybyna qaraı baǵalanǵanmen, báribir de 100 myń teńgeden kem túspeıdi.

Sıqyrly boıaýdyń syryn uqqan bul myqshege mamanymyz eshqandaı búdjettik mekemede jumys istep kórmegen.

– Ábden kórkem sýret salasyna ǵana den qoıyp, mamandyǵym boıynsha soǵan kásibı turǵyda mashyqtanyp alǵandyqtan, men beıbaq «Eńbek kitapshasy» degenniń ne ekenin de bilmeımin ǵoı, – dep kúlip qoıady ózi. Osy bir mańdaı ter, myqty mashyǵynyń arqasynda baspanaly bolyp, jańa markaly «temir tulpardy» tizgindep júrgen jaıy bar qazir. Úılený toıynyń shyǵynyn da ózi kótergen. Táýir jumystyń jemisin jep, táýelsiz tirlik keship jatqany súısintpeı qoımaıdy.

– Ybyraı Altynsarın atyndaǵy Arqalyq memlekettik pedagogıkalyq ınstıtýtynyń kórkem sýret jáne grafıka fakúltetinde oqyp júrgen bozbala shaǵymyzda alǵashqy ustazymyz bolǵan Quryshbek Jarasqan, Marat Beralıev, taǵy basqa da jergilikti sýretshiler bizge qıyn janrlardy meńgertip, adal eńbekke jandaryn sala baýlydy. Oqý bitirgennen keıin ásker qataryna alynyp, Otan aldyndaǵy boryshymdy ótep keldim. Sosyn «eki qolǵa – bir kúrek» izdep, Qazaqstan Sýretshiler odaǵynyń Astana fılıalyna at basyn tiredim. Abaı jáne Jeńis dańǵyldarynyń qıylysynda ornalasqan shaǵyn ǵana ǵımaratta sol kezdegi fılıal tóraǵasy Sembiǵalı Smaǵulov aǵamyzdyń qasynda júrip, shyńdala túsýime týra keldi. Negizinde Sembiǵalı Abzalbekuly – meniń kóp nársege kózimdi ashqan rýhanı ustazym, – deıdi Estaı.

Shynymen de Sekeńniń senimine selkeý túsirmeýge tyrysqan jas talap Astana sýretshileri ustahanasynyń kóriginde ysyldy. Rýhanı ustazy ony otqa da, sýǵa da saldy. Sóıtip, kúrdeli mamandyqtyń ystyǵy men sýyǵyna qatarynan tóze bilýge beıimdedi. Sonyń arqasynda qazir ózi de shákirt tárbıeleıtin shamaǵa jetip otyr.

– Astanadaǵy keıbir ulttyq músinderde de meniń qoltańbam bar. Ózgesin bylaı qoıa turǵannyń ózinde, Respýblıka-Qabanbaı batyr dańǵyldarynyń túıiser tusynda turǵan «Tomırıs» músininiń bólshek qurylysyn Almatyda jasap, Astanada qurastyrdyq. Al «Qazaq eli» monýmentiniń shaǵyn nusqasyn úılestirý kezinde kózime jelim tamyp ketip, aýrýhanadan bir-aq shyqqanmyn. Áıteýir, kózim aǵyp ketýden aman qaldy. Odan buryn Aqordanyń ishin bezendirýge de eptep atsalysqanymdy bireý bilse, bireý bilmes. Jyl saıyn qysta elordamyzdyń sánine sán qosyp turatyn muz qalashyqtary men muzdy músinderdiń mindetti túrde bizdiń qoldan ótetini – men úshin maqtanysh, astanalyq áriptesterim úshin de abyroı...

Sózin osylaı sabaqtap, ózin jan-jaqty qyrynan tanyta bastaǵan «Eńbek kitapshasynsyz» eńbekqorǵa «Zeınetke shyǵatyn jasyńda ókinip qalmaısyń ba?» degen saýaldy da qoıyp kórdik. Iyǵyn qıqań etkizdi.

– Ókinbeıtin shyǵarmyn. Súıikti kásibiniń arqasynda tanylyp, elge paıdaly eńbek etken erlerdiń «áttegen-aıǵa» erik berip júrgenin estimeppin. Kerek deseń, baıaǵy zamanda ata-babalarymyz eleýli ás-áreketterin «Eńbek kitapshasymen» ólshemeı-aq, zeınetaqysyz ómirden ozyp jatty ǵoı. Ári-beriden soń, meniń zeınet jasyna jetetinime kim kepildik bere alady?.. Áıelim, balam, úıim, kóligim bar. Odan artyq dúnıede sharýam shamaly, – deıdi.

Bir eseppen, bunysy da durys sıaqty. Áıtpese, tańnan keshke deıin tyrtyńdap, basshy-qosshylardyń qas-qabaǵyna qaraı jumys istep úırengen búdjettik mekeme ókilderiniń jetisip júrgeni sırek. Áli kúnge deıin qurqyltaıdyń uıasyndaı bir baspanaǵa zar bolyp, páteraqydan artylǵan aqshasyn kúndelikti jolaqy men tamaǵyna ǵana shym-shymdap jumsap júrgenderi basym. Osyndaıda kúnkóristiń kiltin taba bilgen Estaı syndy esti qazaqtardyń baryna da táýbá deısiń. Ózge jurttan nemiz kem?!.

Erkeǵalı BOLATULY