Áleýmettik medısınalyq saqtandyrý qorynyń málimeti boıynsha, jalpy qaıtys bolǵan adamdardyń 74 prosenti sozylmaly aýrýlar saldarynan kóz jumǵan. Kórsetkishtiń eń kóbi, ıaǵnı 41 prosenti qan aınalymy júıesiniń, 22 prosenti - tynys alý músheleri, 20 prosenti - onkologıalyq aýrýlardyń saldarynan bolyp jatady. Qalǵan 17 prosentte jazataıym oqıǵalar, jaraqattar men ýlaný jáne as qorytý júıesi aýrýlary sebepker bolady.
Mundaı kórsetkishter halyqtyń aýrýlardyń aldyn alýǵa den qoıa bermeıtindiginiń dáleli. Qazaqstannyń árbir onynshy turǵyny medısınalyq kómekke qysyltaıań jaǵdaıda ǵana júginedi. Jyl saıynǵy 2,9 mln gospıtalızasıanyń 68 prosenti nemese 1,9 mln adam – bul shuǵyl pasıentter.
Astana qalasy boıynsha «ÁMSQ» KEAQ fılıalynyń dırektory Nurlybek Qabdyqaparovtyń aıtýynsha, Qazaqstanda 2017 jyly densaýlyq saqtaý salasyna jumsalǵan jalpy shyǵyn kólemi jalpy ishki ónimniń 3,7 prosentin qurady. Densaýlyq saqtaý salasyna jumsalatyn shyǵyn jalpy ishki ónimniń 6 prosentin quraıtyn, damý jaǵynan Qazaqstan tárizdi elderge qaraǵanda, bul anaǵurlym tómenirek kórsetkish. Qazaqstanda 2017 jyldyń qorytyndysy boıynsha densaýlyq saqtaý salasyna jumsalǵan shyǵyndar 41 paıyzdy qurady, bul shektik deńgeıden eki ese joǵary. Sonymen qatar jeke shyǵyndardyń 30 prosentten astamy kepildendirilgen tegin medısınalyq kómek kólemi sheńberinde maǵlumdalǵan aqyly medısınalyq qyzmetterdi satyp alýǵa jumsalady.
Qazaqstanda negizgi demografıalyq trend retinde ómir súrý uzaqtyǵy, turǵyndardyń jas-jynystyq quramynyń ózgerýi qarastyrylady. Elimizde 2006 jyldan beri ómir súrý uzaqtyǵy 6,3 jylǵa ulǵaıdy, bul kórsetkish keleshekte ósedi dep boljanyp otyr. Aldaǵy ýaqytta medısınalyq qyzmetterdi belsendi tutynýshylardyń sany ary qaraı ósedi dep kútilýde. 2025 jylǵa qaraı Qazaqstanda balalar sany 5,6 mıllıonnan 6,9 mıllıon adamǵa deıin, ıaǵnı 23 prosentke ósedi dep boljanyp otyr. Sonymen qatar egde jastaǵy adamdar sany 41 prosentke 1,9-dan 2,8 mıllıon adamǵa deıin ósedi. Osy turǵyda otandyq densaýlyq saqtaý salasy turǵyndardyń qajettilikterin tolyǵymen qamtamasyz etýi tıis.
Mindetti áleýmettik medısınalyq saqtandyrýdy engizý densaýlyq saqtaý júıesin qarjylandyrý úshin qosymsha quraldardy engizýdi qarastyrady, ıaǵnı, óz tarapynan azamattardyń ál-aýqatyn joǵarylatý men Qazaqstandaǵy ómir sapasyn jaqsartýǵa septigin tıgizedi.
Murat Rahımjanov
