Memleket basshysy Batys Qazaqstan oblysyna jumys sapary barysynda jıyntyq jıhaz jasaýdyń tehnologıalyq úderisterimen tanysty.

Elbasy 2018 jylǵy "Tórtinshi ónerkásiptik revolúsıa jaǵdaıyndaǵy damýdyń jańa múmkindikteri" atty joldaýynda "Indýstrıalandyrý jańa tehnologıalardy engizýdiń kóshbasshysyna aınalýy tıis", - degen edi.

Qazaqstan Prezıdentine kásiporynnyń qazirgi qarjy-sharýashylyq jaǵdaıy týraly málimdelip, óndiris aýqymyn ulǵaıtý jáne daıyn ónim tizbesin keńeıtý jospary jóninde aıtyldy.

Sondaı-aq, fabrıkany aralaý kezinde Nursultan Nazarbaevqa óńirdiń áleýmettik-ekonomıkalyq damý barysy, sonyń ishinde ónerkásip sektorynyń, shaǵyn jáne orta bıznestiń qazirgi ahýaly men perspektıvalary jóninde baıandaldy.

Budan bólek, kásiporyn aýmaǵynda Memleket basshysyna ındýstrıalyq-ınnovasıalyq damý baǵdarlamasy aıasynda júzege asyrylyp jatqan jobalar tanystyryldy. Atap aıtqanda, fın tehnologıasy boıynsha turmystyq qatty qaldyqtardy qaıta óńdeý júıesin jańǵyrtý, iri qara men usaq maldyń terisin óńdeý, nan jáne makaron ónimderin óndirý, hımıa óndirisi, dızel otynynyń komponentterin sýmen tazalaýǵa arnalǵan jobalar bar.

«Kvant» kompanıasy porolon, matras, jıyntyq jáne jumsaq jıhaz jasaýmen aınalysady. Óndiriste qoldanylatyn barlyq materıal ekologıalyq turǵydan taza ári memlekettik standarttarǵa saı keledi.

Bul jıhazdar eýropalyq taýar óndirýshilerdiń zamanaýı qural-jabdyǵymen jáne ozyq tehnologıalardy qoldaný arqyly jasalady.