Búgin Ońtústik Qazaqstan oblysynyń ákimi Janseıit Túımebaev Jambyl oblysy «Mátibulaq» oqý polıgonynyń bazasynda oblystyń aýmaqtyq qorǵanys brıgadasynyń Áskerlerdiń Jaýyngerlik paradqa tartylǵan jeke quramdy marapattady. Sonymen birge Otan aldyndaǵy óz boryshyn óteýge attanyp jatqan jas sarbazdarǵa sáttilik tiledi.
«Tárbıe – tal besikten» degen atam qazaq, kókireginde namysy bar, boıynda kúsh qýaty bar, Otan úshin otqa túsetin urpaq ósirdi. Sol urpaqtyń jastarymen qázirgi tańda Qazaqstan áskeri jasaqtalýda. Osy áskerdiń qalyptasýynda Ońtústik Qazaqstannyń eleýli orny bar. Bıylǵy kóktemgi shaqyrtý kezinde Qazaqstan Respýblıkasynyń Qarýly kúshteri qataryna 2,5 myńnan astam ońtústik jaýyngerleri attandy. Ár adam Otan súıýdi ózinen bastasa ǵana nátıje shyǵady, ıaǵnı el damyp, jer kórkeıedi. Mine sol úshin de ár azamat óz deńgeıinde elimizdiń órkendep ósýine, gúldenýine, tynysh ári beıbit ómir súrýine úles qosatynyna senimdimin»,-dedi óńir basshysy.
Aıta keteıik, Áskerlerdiń Jaýyngerlik paradynda oblystyń aýmaqtyq qorǵanys brıgadasynyń jeke quramy ózderiniń joǵary daıyndyǵyn kórsete bilip, áskerı qyzmeti jáne ishki tártipti uıymdastyrý konkýrsynda 1-shi orynǵa ıe bolǵan.
Saltanatty sharaǵa qatysqan Qazaqstan Respýblıkasy Qorǵanys mınıstrdiń orynbasary general-leıtenant Talǵat Mýhtarov ár jyly merzimdi áskerı qyzmetke 24 myń azamat shaqyrylsa, onyń 4 myńǵa jýyǵy Ońtústik Qazaqstan oblysynyń jastary bolyp tabylatynyn atap ótti.
«Búgin biz, Qazaqstan Respýblıkasy Qarýly Kúshteri qataryn tolyqtyrýǵa, otan aldyndaǵy mindetin atqarýǵa jas urpaqtarymyzdy saltanatpen shyǵaryp salýdamyz. Sońǵy 2-3 jyldyń qorytyndysy boıynsha Qarýly kúshterdiń jas býynmen tolyqtyrý jumystarynda sany men sapasy jaǵynan Ońtústik Qazaqstan oblysy respýblıkada aldyńǵy qatarda. Elin qorǵaý erdiń isi, osyndaı er-azamattardy dúnıege ákelip, tálim-tárbıe berip, ósirgen ata-analarǵa sheksiz alǵysymdy bildirgim keledi!»,-dedi T.Mýhtarov.
Budan bólek, áskerı sharaǵa 35748 áskerı bóliminiń bastyǵy men jeke quramy, OQO QİJD bastyǵy men ókilderi, OQO ardagerler keńesiniń ókilderi, ásker qataryna attanýshylar men olardyń ata-analary, 35748 áskerı bóliminiń jaýyngerleri, Shymkent qalasy Sabyr Rahymov atyndaǵy «Jas Ulan» mektebiniń tárbıelenýshileri men Shymkent qalasynyń jastary qatysty.
