Qazaqstan men Nıderland arasyndaǵy aýyl-sharýashylyǵy yntymaqtastyǵy keń. "Nıderland - Qazaqstannyń basty ınvestory. Bul el ınovasıada, ekologıa men medısınada álemde kóshbasshy sanalady. Sondaı-aq, Nıderlandta aýyl sharýashylyǵy sektory da óte tıimdi", - degen edi Elbasy Nursultan Nazarbaev.
Ońtústik Qazaqstan oblysynyń ákimi J.Túımebaev Nıderland Koróldiginiń Qazaqstan Respýblıkasyndaǵy Tótenshe jáne Ókiletti elshisi Ian Kop Dırk, Almaty qalasyndaǵy Elshilik keńsesiniń saýda-sattyq jónindegi mamany Z.Sadykdjanqyzymen kezdesti. Basqosýda taraptar eki el arasyndaǵy ekonomıkalyq baılanysty nyǵaıtý, birlesken ınvestısıalyq jobalardy iske asyrý jaıyn aqyldasty, - dep habarlaıdy Qamshy.kz aqparat agenttigi.
Kezdesý barysynda aımaq basshysy qonaqtardy óńirimizge kelýimen quttyqtap, oblystyń ekonomıkalyq áleýetimen jáne kásipkerlerge jasalyp jatqan múmkinshikterimen tanystyrdy.
«Nıderland – Qazaqstan ekonomıkasyndaǵy eń iri sheteldik ınvestor. Sizder jaqtan elimizge tartylǵan ınvestısıanyń kólemi 6 mlrd. AQSH dollaryna jetti. Ótken jyldyń qorytyndysy boıynsha eki el arasyndaǵy taýar aınalymy da aýqymdy, 5 mlrd. AQSH dollarynan asty. Bul qarym-qatynas ásirese bizdiń oblysymyz úshin tıimdiligi erekshe bolyp otyr. Óńirimiz aýyl sharýashylyq salasyna beıim aımaq. Osy baǵytta ózderińizben birlese otyryp, kóptegen jobalardy júzege asyrdyq. Sizderdi budan da tyǵyz baılanys ornatýǵa shaqyramyn», – dedi Janseıit Qanseıituly.
Sondaı-aq, óńir basshysy qonaqtardy OQO men Nıderland arasynda arnaıy memorandým túzýge shaqyrdy. Kelisim-shart negizinen aýyl sharýashylyǵy salasyn órkendetýge baǵyttalatyn bolady.
Óz kezeginde Ian Kop Dırk oblys ákiminiń usynysyna qoldaý bildirip, jańa jobalardy birlesip júzege asyrýǵa daıyn ekendikterin jetkizdi. Kezdesý sońynda aımaq basshysy qonaqtarǵa syı-sıapat jasap, estelikke sýretke tústi.
Nıderland AQSH-tan keıingi álemdik aýyl sharýashylyq ónimderin eksporttaýshy. Jyl saıyn 80 mlrd. eýrodan astam soma kóleminde aýylsharýashylyq ónimderin eksporttap, eldiń Jalpy ishki óniminiń 10 paıyzyn qurap otyr. Nıderland Koróldigi Qazaqstanǵa 70 mlrd dollardan astam ınvestısıa quıǵan.
