Kásipker bolý ár adamnyń mańdaıyna jazylǵan nesibe dep aıta almaımyz. Desek te, óz múmkindigine sene bilgen, alǵa umtylǵan ár azamat nebir synnan súrinbeı ótip, bıik belesterdi baǵyndyra alatyny anyq.Elimizde shaǵyn jáne orta bıznesti damytýǵa arnalǵan baǵdarlamalar bar bolsa da, áıel adamdarǵa bıznespen aınalysý eki ese qıyn ekeni belgili. Osy oraıda kásibi men otbasyn birge alyp júrgen názikjandylar bar. Solardyń biri - Batys Qazaqstan oblysynyń Qaztalov aýdanyndaǵy Jalpaqtal aýylynyń turǵyny Jumazıa Moldaǵalıeva.
Ol jetekshilik etetin «Qaısar» sehy plasıkalyq esik-tereze ónimderin jasaýmen aınalysady. Atalmysh seh shyǵaratyn ónimder aýdan turǵyndaryna, qala berdi óńir jurtshylyǵyna jaqsy tanys. Kásipker ananyń ómir jolyn aıta ketsek, ol mektep bitirgennen keıin Oral kooperatıvtik tehnıkýmyna oqýǵa túsip, ony jaqsy baǵamen támamdaıdy. Keıin Tańat eldi mekenindegi azyq-túlik dúkeninde satýshy bolyp jumys isteıdi. 1985 jyldan bastap Jalpaqtal aýylyndaǵy et kombınatyna jumysqa kirisken. Mal soıý – áıel adamnyń isi emes ekni belgili. Dese de, on jyldaı osy jumysty adal atqarady. Kombınatta júrip bolashaq jary Jubandyqty keziktirip, turmys qurady. Ekeýi egiz qozydaı qol ustasyp, ómirde kezdesken barlyq aýyrtpalyqtardy birge ótkerip keledi. Qos ul men qos qyz tárbıelep ósirdi. Búginde olardyń bar lyǵy da balaly-shaǵaly.
Jumazıa Moldaǵalıevanyń aıtýynsha, plasıkalyq buıymdar sehyn ashýǵa úlken uly sebepker bolǵan. Ol oqýyn bitirgen soń Oralǵa baryp plasıkalyq tereze men esik jasaıtyn kásipkerlik salasynda segiz jyldaı jumys jasaǵan.
-Balam ylǵı da aýylymyzdan plasıkalyq buıym jasaıtyn seh ashsaq dep armandaıtyn. Balalarymmen aqyldasa otyryp, «Qaısar» atty sehty ashtym. Onda qazir eki ulym qyz-met jasaıdy. Plasıkalyq esik- terezelerge tapsyrys negizinen aýyl turǵyndarynan túsýde. Basynda qalaı bolar eken, ónimderimiz óter me eken dep alańdaıtynbyz. Shyǵarǵan ónimderimiz aýyldastarymyzdyń kóńilinen shyǵyp, aýyl-aımaqtan, ózge aýdandardan birtindep tapsyrystar da túse bastady. Sondaı-aq qurylysy júrip jatqan ǵımarattarǵa da tapsyrys qabyldaıtyn boldyq, – deıdi keıipkerimiz.
Bir ereksheligi, bul seh ónimderin aýyl ardagerlerine jeńildikpen jasap beredi. Ónimderge jaz aılarynda tapsyrystar óte kóp bolady eken. Sol kezde bul sehqa qosymsha úsh-tórt jumysshy alynady. Moldaǵalıevter otbasyn kásipkerler otbasy deýge bolady. Iaǵnı Jumazıa apaıdyń jary, aýyldyń syıly azamaty Jubandyq aǵa 2012 jyly «Jubandyq» atty sharýa qojalyǵyn qurǵan. Sharýa qojalyǵynda 400 bas qoı men iri qara maly bar. Qojalyq basshysynyń aıtýynsha, qyrqylǵan qoı júnin qolónermen aınalysatyn aýyl adamdaryna tegin beredi. Qoı men sıyrdan alynǵan et, sút, maı ónimderin uly Saǵyndyq ashqan «Káýsar» atty dúkende sattyqqa shyǵarady. Osylaısha Moldaǵalıevter áýleti aýyl-aımaqty, elimizdi damytýǵa óz úlesterin qosyp keledi.
