Alty Alashqa - aqjoltaı jańalyq! Baıtaǵymyzda «Men Qazaqpyn» ulttyq televızıalyq megajobasy ótýde. Dástúrli án, terme-jyrdyń mártebesin kóterýge arnalǵan baıqaýdyń irikteý kezeńi Ońtústik oblysta da bastaldy, dep habarlaıdy Qamshy.kz aqparat agenttigi OQO ákimdiginiń baspasóz qyzmetine silteme jasap.
Búgin teriskeıdegi Sozaqqa qazaqtyń saf án óneri bastaýynan rýhanı nár alyp, qanyp ishken talanttylarymyz jınalýda. El ishi – óner kenishi. Dástúrimizdi dáriptep, ulttyǵymyzdy ulyqtaıtyn jobanyń alǵashqy synyna kásibı óner ıesi bolmasa da, ynta tanytqan talanttardyń qatary qalyń. Kúmbirlegen kúı, áýelegen ánimen dara shyqqan daraboz respýblıkalyq baıqaýda óńirimizdiń ózgege uqsamaıtyn ónerdegi órnegen pash etetin bolady!
Elbasy rýhanı jańǵyrý jónindegi jalpyulttyq ıdeıany jarıalaǵanda jańa úderis eldiń rýhanı tamyrynan nár alýy tıis dedi. Rýhanı tamyr – ata-babadan mıras bolyp qalǵan saltymyz, til men dil. Onyń ishinde óner, qala berdi dástúrli ánshilik, kúıshilik jáne termeshiliktiń orny erek. Mine, osy rette respýblıkalyq dárejede qolǵa alynǵan «QAZAQSTAN» ulttyq telearnasynyń «Men Qazaqpyn!» televızıalyq mega jobasy óńirlerde irikteý sharalaryn qolǵa aldy. Baıqaýdyń basty maqsaty — qazaq xalqynyń tól óneri, sonyń ishinde jyr-termeler men kúılerdi búgingi zaman talabyna saı jańartyp, óskeleń urpaqqa jetkizý. Baıqaýǵa qatysýshylardyń jas ereksheligi -18 ben 40 jas aralyǵy. Oq boıy ozyq shyqqandar televızıalyq baıqaýǵa joldama alady. Sondaı-aq saxnaǵa shyǵatyn ónerpazdardyń kıimi qazaqy úlgide ári búgingi zaman talabyna saı bolýy tıis. Ulttyq ónerdi urpaqqa nasıhattaıtyn «Men Qazaqpyn!» televızıalyq megajobasynyń óńirlerde irikteý jarystary Ońtústik Qazaqstan oblysynyń ákimi janseıit Túımebaevtyń qoldaýymen 14 aýdanda da ótkizilmek. Bilikti mamandardan quralǵan arnaıy top árbir aýdandy aralap, jobaǵa qatysýshylardy anyqtaıdy. Alǵashqy irikteý saıysy, mamyr aıynyń 17-si kúni Sozaq pen Báıdibek aýdandarynda bastaý aldy. Osydan keıin kórermen qaýym baıqaýdyń kúndeligi men negizgi konkýrsyn teledıdardan kóre alady. Jobanyń respýblıkalyq aınalymynda jeńiske jetken jeńimpazdar "Jyldyń eń úzdik dástúrli ánshisi", "Jyldyń eń úzdik termeshisi" jáne "Jyldyń eń úzdik kúıshisi" atalymdary boıynsha marapattalady.
