Báıdibek aýdany Boraldaı aýylynda «Boraldaıdyń boztorǵaıy» aqyn Orynbaı Taımanovtyń 150 jyldyǵy atalyp ótti. Shara Orynbaı Taımanovtyń kesenesinde qurbandyq shalynyp, quran oqýmen bastaldy. Bul jaıynda Qamshy.kz aqparat agenttigi Báıdibek aýdanynyń baspasóz qyzmetine silteme jasap habarlaıdy.
Odan keıin Boraldaı aýylyndaǵy «Qarataý» mádenıet úıinde jalǵasyp, aýdan ákimi B.Tanagózov kelgen qonaqtar men aýdan turǵyndaryn quttyqtady. O.Taımanovtyń 150 jyldyǵyn atap ótýge, keseneni qalpyna keltirýge úles qosqan birqatar azamattardy aqynnyń 150 jyldyq medalimen jáne alǵys hattarmen marapattady. Jazýshy-dramatýrg, Qazaqstannyń eńbek sińirgen qaıratkeri, Halyqaralyq ádebı «Alash» syılyǵynyń laýreaty E.Turysov pen qoǵam qaıratkeri, jazýshy M.Baıǵut O.Taımanovtyń óleńderi, jyr-dastandary, aıtystary jınaqtalyp, jaryq kórgen kitabynyń lentasyn saltanatty túrde qıdy.
Shara respýblıkalyq aqyndar aıtysyna jalǵasyp, elimizdiń Astana, Jambyl Qyzylorda, Semeı Shymkent qalalary men Báıdibek aýdanynan barlyǵy 10 aqyn qatysty.
Aıtystyń qorytyndysy boıynsha bas júlde avtokólikti Báıdibektik Birjan Baıtýov, birinshi oryndy Almatylyq Rınat Zaıytov, ekinshi oryndy Báıdibektik Qajymuqan Abzalov, úshinshi oryndy Semeılik Rústem Qaıyrtaı ıelendi. Sonymen qatar aıtysker aqyndarymyzǵa aýdan ákimdigi daıyndaǵan aýdan ákiminiń, Gúlsim Ádilbekovanyń, Abaı Aınabekovtiń, Amanbaı Qanashaıdyń, Manatqyzynyń, Aınabek Nysanovtyń arnaıy júldeleri men O.Taımanovqa 150 jyl medali tabys etildi.
Aıta keteıik, 1991 jyly irgetasy qalanyp, aqynnyń kesenesiniń soǵylýyna tikeleı basshylyq etken, elimizdiń qoǵam qaıratkeri, Ońtústik Qazaqstan oblysynyń, Báıdibek, Saryaǵash aýdandarynyń, Jambyl oblysynyń Shý aýdanynyń «Qurmetti azamaty» O.Asanǵazıeva aqyn O.Taımanovtyń 150 jyldyǵyna baılanysty ótken respýblıkalyq aqyndar aıtysynyń qazylar alqasyna tóraǵalyq etti.
