Ońtústik Qazaqstan oblysy ákimdiginde oblys ákimi Janseıit Túımebaevtyń tóraǵalyǵymen óńirde ornalasqan saýda oryndar men bazarlardy zań talabyna saı retteý boıynsha jıyn bolyp ótti. Bul jaıynda Qamshy.kz aqparat agenttigi OQO ákimdiginiń baspasóz qyzmetine silteme jasap habarlaıdy.

Jıyndy ashqan óńir basshysy jalpy oblys boıynsha 120 bazar men saýda oryndary bar ekenin aıtyp, onyń basym kópshiligi tıisti normatıvtik standartqa saı kelmeıtinin atap ótti.

«Búgingi májilis Qazaqstan Respýblıkasy Úkimetiniń «Saýda qyzmetin retteý týraly» Qazaqstan Respýblıkasy Zańynyń bazarlardy turaqty saýda obektilerine kóshirý normalaryn qoldanysqa engizý jónindegi túbegeıli sharalardy qabyldaý» týraly arnaıy tapsyrmasynyń oryndalýy boıynsha ótkizilip otyr. Atalǵan tapsyrmany oryndaý úshin, oblys ortalyǵyndaǵy jáne aýdan, qalalarda ornalasqan saýda oryndary men jalpy bazarlardaǵy sanıtarlyq talaptardy, komýnaldyq sharýashylyq, sáýlet-qurylys, zańsyz qurylys, jerdi óz betinshe basyp alý, jerdi nysanaly maqsatynda paıdalanbaý, qaýipsizdik erejeleriniń saqtalmaýy jáne basqa da ózekti máseleler talaptarǵa saı óz sheshimin tabýy tıis»,-dedi ákim.  

Kún tártibindegi másele boıynsha sóz alǵan Shymkent qalasy ákiminiń orynbasary Gúljan Qurmanbekova qaladaǵy 29 bazardyń 15-i Bas josparǵa sáıkes kelmeıtinin, al 14 bazar qurylymdaýdy qajet etetinin málim etti. Sonymen qatar, ol Shymkent qalasynyń bólshek saýda kólemi 329,1 mlrd. teńgeni quraıtynyn, onyń 69 paıyzy shaǵyn, orta jáne iri saýda kásiporyndarynda, al 31 paıyzy bazarlarda jasalǵan saýda kólemi ekenin aıtty.

Budan bólek, OQO TJD bastyǵy azamattyq qorǵaý polkovnıgi  Nurbolat Derbisov  oblys jáne Shymkent qalasy aýmaǵyndaǵy saýda nysandarynyń órt qaýipsizdigi jaǵdaıy týraly baıandama jasady.

Onyń aıtýynsha, Bas prokýratýra men İshki İster mınıstriniń tapsyrmasyna sáıkes Departament qyzmetkerlerimen oblys aýmaǵyndaǵy joǵary táýekel dárejesine jatqyzylǵan 106 iri oıyn-saýyq saýda ortalyqtarynyń 101-ne órt tehnıkalyq tekserýler júrgizilgen.

Sonymen qatar, ol tekserý kezinde Memlkettik órt baqylaý ınspektorlarymen obektiniń evakýasıalyq shyǵý, órt sóndirý avtokólikteriniń ǵımaratqa  jáne sý kózderine jetý joldaryna,  avtomatty dabyl qaqqysh jáne sóndirý qondyrǵylaryna, alǵashqy órt sóndirý jabdyqtaryna, bazarlarda órtke qarsy araqashyqtyqtarynyń saqtalýyna, obekt qyzmetkerleriniń tótenshe jaǵdaı jáne oqıǵa kezinde is áreketteriniń biliktiligne asa nazar aýdarylǵanyn atap ótti.

Jıyndy qorytyndylaǵan oblys basshysy barlyq quzyrly organdar men jaýapty sala basshylaryna bazar jumystaryn retteý baǵytyndaǵy barlyq zańdarmen qaralǵan quqyqtaryn óz dárejesinde qoldana otyryp, belsendi túrde jumys jasaýdy, ondaǵy sanıtarlyq talaptyń saqtalýyn qadaǵalaýdy jáne bazar mańyndaǵy avtoturaq máselesin retteýdi tapsyrdy.