Qarasaı aýdanyndaǵy «Line Brew Bottlers» JSHS - syra óndiretin iri kásiporyndardyń biri. Zaýytta zamanaýı tehnologıalar men úzdik avstrıalyq jabdyqtar qoldanylady. Bul óz kezeginde joǵary sapaly ónimniń shyǵýyn ǵana emes, onyń ekologıalyq qaýipsizdigin de qamtamasyz etedi.
Alaıda osydan biraz ýaqyt buryn shendilerdiń áreketinen kásiporyn jumysyn toqtatyp, bankrotqa ushyraýdan aman qaldy. Oblystyq kásipkerler palatasynyń sarapshylary isti qolǵa alǵannan keıin jaǵdaı ózgere tústi.
Buǵan deıin Almaty oblysynyń Qarasaı aýdanynyń mamandandyrylǵan aýdanaralyq ákimshilik soty JSHS-ǵa 200 aılyq eseptik kórsetkish (481 myń teńge) túrinde aıyppul salyp, quıylý sehynyń qyzmetin bir aıǵa toqtatý týraly sheshim shyǵardy. Osyndaı qatal uıǵarymǵa aýdandyq qoǵamdyq densaýlyq saqtaý basqarmasynyń sanıtarly-epıdemıologıalyq salasynda anyqtalǵan faktiler negiz boldy.
«Seh jumysyn bir aıǵa toqtatý kásiporyndy jabýmen teń. Munyń saldary salyq pen jumysshylarǵa eńbekaqy tólemeýge ákeledi. Sonymen birge, sottyń bergen ákimshilik jazasy jasalǵan quqyqbuzýshylyqtyń túrine sáıkes kelmeıdi jáne óndiristik sebepter esepke alynbaǵan. Sondyqtan sottyń birinshi satydaǵy shyǵarylǵan qaýlysyn alyp tastaý jónindegi apelásıalyq shaǵymy berildi», - deıdi istiń mán-jaıyn túsindirgen Almaty oblysy Kásipkerler palatasynyń Kásipkerlerdiń quqyǵyn qorǵaý jáne ákimshilik kedergilerdi azaıtý jónindegi bólimniń sarapshysy Dıas Otashbaev.
Aıta ketý kerek, shaǵymdy qarastyrý kezinde kásiporyn tarapynan basqarmanyń barlyq nusqamalary tolyǵymen oryndalǵan. Osy sebepti seh jumysyn toqtatý týraly qosymsha jazany taǵaıyndaýǵa sotta negiz qalmady.
« ... Atalǵan qosymsha jaza kásiporynnyń toqtaýyna, jumysshylardyń eriksiz jumysqa kelmeýi men eńbekaqy almaýyna, búdjetke salyqtyń túspeýine, osylaısha kásiporyn men memleket qyzmetin teris zardaptarǵa ákep soqtyrady», - delingen Almaty oblystyq sotynyń qaýlysynda.
Osylaısha sot kompanıanyń shaǵymyn ishinara qanaǵattandyryp, quıylý sehynyń qyzmetin bir aıǵa toqtatý týraly sheshimdi ózgertti. Qazirgi tańda zaýyt kúndelikti qyzmetin jalǵastyryp keledi.
