Shymkent qalasynyń ákimi qalanyń bas josparyna sáıkes shahardyń egjeı-tegjeı josparyn iske asyrýdyń keshendi jobasyna qol qoıdy. Shymkenttiń Bas josparyn ózektendirýdiń birneshe sebebi bar. Máselen, qalada josparǵa saı kelmeıtin qurylys nysandary kezdesedi, birqatar úıler aýyl sharýashylyǵy salasyna arnalǵan jerde salynǵan.

Aıta keteıik, buǵan deıin shahar josparynyń egjeı-tegjeı jobasy qala ákimi Nurlan Saýranbaevtyń synyna ushyraǵan bolatyn. Sebebi, jobany avtorlarymen birge talqylaǵan kezde onyń qala aýdandaryna saı kelmeıtini anyqtalǵan bolatyn. "Sizder bul aýmaqtarda adamdar turatynyn esepke almaǵansyzdar. Shaǵynaýdan turǵyndarynyń jaǵdaıy qaralmaǵan. Bul jumysty qabyldaı almaımyn" – degen edi ákim. Jalpy, Shymkenttiń bas josparyn ózektendirý jumysy úsh jyl kóleminde júrdi.

- Bas josparǵa saı kelmeıtin turǵyn úıler 30 paıyzdy quraıtyn. Iaǵnı, bas josparda bul úıler kórsetilmegen. Bul degenimiz - turǵyndar ınjenerlik ınfraqurylymdar men joldar júrgize almady. Olar turǵylyqty jerinde tirkele almady jáne sonyń saldarynan emhanaǵa nemese mektepke de bekitilmedi. Bul aýdandardyń bolashaǵy joq edi, - dep atap ótti Shymkenttiń bas sáýletshisi Nurlan Arhabaev.

Jospardy ózektendirý qalaǵa qosylǵan kóptegen eldimekenderdiń jobasyn egjeı-tegjeıli qarastyrýǵa múmkindik beredi. Al Bas jospar – qalany damytýdyń uzaq merzimdi tujyrymdamalyq baǵdarlamasy.