Atyraýdaǵy Almagúl móltek aýdanyndaǵy 16 qabatty úıde isten shyqqan lıfttiń shahtasyna eki birdeı jasóspirim qulap, qaıtys boldy, dep habarlaıdy Qamshy.kz aqparat agenttigi mgorod.kz portalyna silteme jasap.

- Resmı málimetterge sáıkes 21 mamyrda túngi 23:30-da júk tasymaldaýǵa arnalǵan lıfttiń shahtasyna baıqaýsyzda 14 jastaǵy bala qulap, kóz jumǵan. Oblystyq aýrýhananyń jansaqtaý bóliminde túngi saǵat 01:08 de ekinshi jasóspirimniń júregi toqtady. Júk tasymalyna arnalǵan lıft isten shyǵyp, qoldanysqa jaramaı turǵanyna biraz ýaqyt bolǵan. Qazirgi tańda oqıǵa boıynsha tergeý jumystary júrgizilip jatyr,-dep málimdedi Atyraý qalasynyń azamattyq qorǵaý basqarmasy.

Kýágerlerdiń aıtýy boıynsha lıft jumys istemeıdi. Kabınasy joq lıftke eki jasóspirimniń kirip ketkendigi túsiniksiz bolyp otyr. Shahtaǵa qulaǵan balalar qaladaǵy 34 mekteptiń oqýshylary eken.

- Bul jerdegi lıftte kabına joq. Tek shahtasy ǵana bar. Buryn joba boıynsha eki lıft bolǵan. Biri júk lıfti. Barlyǵy bizdiń qarajatymyzǵa jasaldy. Ekinshi lıftti alyp tastady. Esikteriniń barlyǵyn dánekerledi. Biraq shahtasy sol kúıi qalyp qoıǵan. 15-shi qabattaǵy lıfttiń esigi nelikten ashyq qalǵanyn túsine alar emespin. Balalar osy esikten qulap ketken,-dedi 19-shy úıdiń turǵyny Nurgúl Ájiǵulova.

Almagúl móltek aýdanynyń 22-23 úıleriniń turǵyndary bir aıdan beri «Kaspıı lıft» JSHS qyzmet kórsetetin lıftke shaǵymdanyp kelgen. İsten shyqqan 23-shi úıdiń lıfti qosalqy bólsheginiń joqtyǵy kesirinen bir aıdan asa jumys istemeı, turǵyndar ábigerge túsken.

Esterińizge sala keteıik, Aqtóbe qalasynda da isten shyqqan lıft jýrnalıs áıeldiń oqysta kóz jumýyna sebepshi bolǵan edi.