Eýrazıa Medıa Forýmynyń ashylýynda Almaty qalasynyń ákimi Baýyrjan Baıbek qazaq tilinde sóz sóıledi.

«Qonaqjaı qazaq jerine qosh keldińizder! Búgin sizdermen 15 Eýrazıa Medıa Forýmynda júzdesip otyrǵanyma qýanyshtymyn. Eń alǵash osydan 16 jyl buryn 2002 jyly Elbasynyń qoldaýymen Almaty qalasynda Eýrazıalyq Medıa Forýmynyń tusaýy kesilgen bolatyn. Búginde forým halyqaralyq Medıa keńistiktiń kún tártibindegi máselerdi talqylaý men ońtaıly sheshim usynýda, Batys pen Shyǵysty bir arnaǵa toǵystyrǵan biregeı alańǵa aınaldy. Osynaý aýqymdy basqosýdyń Almatyda ótýi biz úshin úlken mártebe. Sebebi, Forým bir el ǵana emes, búkilálemdik qaýymdastyq úshin kún tártibinde turǵan máselelerdi tanymal aıtýly jýrnalıserdiń, qoǵam jáne saıası qaıratkerlerdiń, sarapshylardyń talqylaýymen erekshelenedi», - deıdi Baýyrjan Baıbek.

Óz sózinde qala ákimi Forýmdy uıymdastyrý komıtetine jáne Darıǵa Nursultanqyzyna jeke alǵyz bildirdi.

«Almaty, Elbasy aıtqandaı, táýelsizdigimizdiń altyn besigi. Myń jyldyq tarıhy bar shahar, elimizdiń mádenı-sporttyq, qarjy-ekonomıkalyq jáne iskerlik ortalyǵy. Álemdik deńgeıdegi basqosýlar men kelissózder qalanǵan Ortalyq Azıadaǵy iri megapolıs. Elimizge kelgen árbir ekinshi sheteldik týrıs arnaıy at basyn buratyn aımaqtardy kórý ortalyǵy. Munda sheteldik uıymdar men transulttyq kompanıalardyń basym-kórshiliginiń ofısteri, elimizdegi birlesken kompanıalardyń 43 paıyzy ornalasqan.

Qala ekonomıkasynda saýda-sattyq, qarjy jáne basqa da qyzmetterdiń úlesi 86 paıyzdy, ekonomıkanyń altyn ózegi shaǵyn jáne orta bıznestiń úlesi 34 paıyzdy quraıdy. 4000-nan astam Úkimettik emes uıymdar jáne 1000-nan astam buqaralyq aqparat quraldary qyzmet etedi. 2016 jyly IýNESKO kóleminde Almatynyń myń jyldyq mereıtoıy, ótken jyly búkilálemdik 28 Ýnıversıada oıyndary joǵary deńgeıde ótti», - dedi Baýyrjan Baıbek.

Onyń aıtýynsha, jyl basynan beri Almaty ekonomıkalyq-yntymaqtastyq jáne «Damý» uıymynyń Eýrazıalyq aptalyǵy, Eýrazıalyq ekonomıkalyq odaqtyń forýmy, BUU Qazaqstan qyzmetiniń 25 jyldyǵyna arnalǵan keńesi uıymdastyryldy.

Almaty ákimi, sonymen qatar, bıyl qazan aıynda Dúnıejúzi Densaýlyq saqtaý uıymynyń Almaty deklarasıasynyń 40 jyldyǵyna oraı is-sharalar uıymdastyrylatynyn aıtyp ótti.