Oblys ákimi Altaı Kólginov oblys ortalyǵyndaǵy jol, qurylys jáne abattandyrý jumystary boıynsha jıyn ótkizdi. Osy aıda Altaı Seıdiruly Oraldyń birqatar qurylys nysandaryn aralǵan edi.  Atap aıtqanda, Aqtóbe, M.Mámetova, Petrovskıı kóshelerindegi kúrdeli jol jóndeý jumystarymen tanysty.

Sonymen qatar, Depo kópiriniń qurylysy men № 2 jylý magıstralin (Kerderi, M.Mámetova kósheleri) qaıta qurý jumystaryn kórdi. Ótken aptada Elordanyń 20 jyldyǵyna oraı salynyp jatqan skver qurylysyn qaraǵan edi.
Keıingi jyldary Oral qalasyn kórkeıtý jumystaryna bólinetin qarjy kólemi ulǵaıyp keledi. Mysaly bir ǵana jol jóndeý jumystaryna 2010 jyly tek 500 mln. teńge bólinse, 2017 jyly Oraldyń ishki joldaryna 8 mlrd.teńge qarjy qarastyryldy. Osynyń nátıjesinde 60-tan astam kóshe jóndelip, 50-ge jýyq aýlalar abattandyrylǵan bolatyn. Qaladaǵy 29 áleýmettik nysanǵa baratyn jol salynǵan. 
Ótken aptada qaladaǵy jol jóndeý jumystary men kópir qurylysynyń qarqynyn baqylap qaıtqan oblys ákimi Altaı Kólginov jıynda birqatar merdigerdiń jumystaryna kóńili tolmaıtynyn jetkizdi. 
– Merdigerler, sizder tegin jumys istep jatqan joqsyzdar. Sizderdiń shalqyp júrgenderińiz memlekettik tapsyrystyń arqasynda. Eger tapsyrys bolmasa, bıznesterińiz de eshteńe de joq. Sondyqtan jumysqa da jaýapty qaraý kereksizder. Jóndeý jumystary kezinde joldardy jaýyp qoıasyzdar da baıaý qımyldaısyzdar. Bul turǵyndardyń narazylyǵyn týdyrady. Biz – ákimdik turǵyndardyń aldynda bergen ýádemizge sáıkes tıisti qarajatty taýyp berip otyrmyz. Sol qarajatqa saı sapaly jumys kórsetý – sizderdiń mindetterińiz. Al sizder bir emes, birneshe qurylys nysanyna birden kirisesizder. Sáıkesinshe, sapasyz dúnıe shyǵady. Kótere almaıtyn shoqpardy belderińizge baılamańyzdar! Erteń ýaqytynan keshiktirseńizder de, sapasyz jol salsańyzdar da turǵyndar bizdi kinálaıdy. Sondyqtan nysandy qabyldaǵanda qatań qadaǵalanatynyn osy bastan eskertkimiz keledi, – dedi Altaı Kólginov.

Osy jıynda oblys ákimi Oral qalasynyń joldaryn jóndeýge qosymsha taǵy 1 mıllıard teńge bólinetinin jetkizdi.

Aıta ketý kerek, byltyr óz isine júrdim-bardym qaraǵan 7 birdeı kompanıanyń isi sotqa joldanǵan bolatyn. Óz kezeginde merdiger kompanıa basshylary jumystaryn sapaly atqarýǵa ýáde etti.