Oblys ákimi Qumar Aqsaqalov Kann kınofestıvalinde top jarǵan jerles aktrısa Samal Eslámovamen kezdesti, dep habarlaıdy Qamshy.kz aqparat agenttigi. 

Kezdesýge Samaldyń ata-anasy İlıas jáne Gúlmaıra Eslámovter, Samaldyń alǵashqy  synyp  jetekshisi Zýhra Abýqyzy jáne Samal jumys istegen Sábıt Muqanov  atyndaǵy sazdy-drama teatrynyń akterleri, sondaı-aq óner kolejiniń oqytýshylary men stýdentteri  qatysty.

Óńir basshysy osy kúnge deıin Qazaqstannyń jáne tipti TMD elderiniń aktrısalary osy ataqqa qol jetkize almaǵandyǵyn basa aıtty. Qumar Aqsaqalov áıgili akterler men aktrısalardyń rýhanı álemi týǵan jerimen myqty baılanysta deıdi.

«Álemdegi eń tanymal kınofestıvalge qatysyp, top jaryp, jetistikke jetý Qazaqstanda ǵana emes, TMD elderinde bolmaǵan jaǵdaı. Qazaqtyń atyn, rýhyn kótergeniń úshin Samalǵa alǵysymyz sheksiz. Qarapaıym aýyldan shyǵyp, osyndaı jetistikke Samal óziniń daryndylyǵynyń arqasynda qol jetkizdi. Kóp adamdar áıgili akterler úlken qalalarda týady dep oılaıdy. Shyn máninde, naǵyz akterler men aktrısalar shaǵyn aýyldardan shyǵady. Adamnyń ishki rýhanı álemi ata-jurtynan, týǵan jerinen, tarıhynan nár alady. Samaldyń  jetistigi osyǵan dálel»,- dedi Qumar Aqsaqalov.

Samal Eslámova dúıim jurtqa quttyqtaýlar men qoldaýlary úshin alǵysyn jetkizdi.

«Elge kelip, jerlesterimdi kórý men úshin qýanysh. Meni qoldap, quttyqtap jatqandaryńyz úshin kóp alǵys aıtamyn», - dedi Samal Eslámova.

Kezdesýde Samaldyń ata-anasy sóz sóılep, qyzdarynyń úlken jetistigine jyly tilekterin bildirip jatqan soltústikqazaqstandyq jamaǵatqa alǵystaryn jetkizdi.

Kezdesý sońyna marapattaý rásimi ótti. Qumar Aqsaqalov Samal Eslámovaǵa 3 bólmeli páterdiń kiltin tabys etti. Aktrısa oblys ákiminiń qurmet gramotasyna da ıe boldy. İlıas jáne Gúlmaıra Eslámovter oblys ákiminiń alǵys hatymen marapattaldy.