Facebook áleýmettik jelisinde 10 mamyrda saıası tutqyndardy azat etýge arnalǵan mıtıńige shyqqan er azamat ýchaskelik polıseıdiń sońyna túskenin aıtyp vıdeo jarıalady.

Er adamnyń aıtýynsha, ol mıtıńige túrmedegi jazasyn óteýshilerdi zorlyq-zombylyq kórsetilmeýin talap etip shyqqan. Narazylyq aksıasyna shyqqandardy Shymkent qalasy Qarataý aýdandyq ishki ister departamentine aparǵan. Onda onyń qolyna túsinikteme hatyn ustatyp, kelesi joly mıtıńige shyǵý úshin ákimdikten ruqsat qaǵazyn alý kerek ekenin aıtqan.

Er adamnyń aıtýynsha, Tólebaev Baqytjan Islamovıch esimdi ýchaskelik polıseı onyń sońynan túsken.

«Dúkenimiz bar. Soǵan jaqyn mańdaǵy jerde páterde turdyq. Tólebaev Baqytjan Islamovıch esimdi ýchaskelik polıseı úı ıesine baryp, "bizdi páterden shyǵarmasań 50 myń teńge aıyppul salamyz" dep qorqytyp, úrkitken. Odan keıin dúkenimizge kelip kelinshegimdi qorqytqan. Ákimdik, salyq komıtetinen, SES-ten adamdar kelip jatyr. Jan-jaǵymyzda qansha dúken bar, páterde turyp jatqan adamdar bar, eshqaısysyn dál bizdikindeı tekserip jatqan joq», - deıdi er adam.

Vıdeo avtory dúkendi qatań tekserip jatqany da ýchaskelik polıseıdiń yqpalymen bolyp jatqanyna senimdi. 

«Men ýchaskelik polıseı Baqytjanǵa baryp «nege úıttiń desem. Bilgenińdi iste» dep shyǵaryp saldy... Meniń daýysym joǵarydaǵylarǵa jetse eken» deıdi ol.

Er adam bala-shaǵasymen 16 mamyrda páterden shyǵýǵa májbúr bolǵan. Vıdeoda ol 5 balasy bar ekenin aıtady. Úlkeni 10-da, kishisi 5-te. Páterden shyǵarylǵannan keıin dúkenge kóship kelgen. Vıdeodan balalarynyń dúken qoımasyndaǵy beton edende uıyqtap jatqanyn kórýge bolady.

Zańgerlerdiń aıtýynsha, ýchaskelik polıseı Tólebaev Baqytjan Islamovıchtiń páter ıesine baryp er adamdy bala-shaǵasymen úıden shyǵarýyn talap etýi zańsyz. Bul óz qyzmetin asyra paıdalaný ekenin aıtady. Zańger vıdeo avtoryna ýchaskelik polıseıdiń tikeleı basshysyna baryp shaǵymdanýǵa keńes beredi. Eger odan eshqandaı nátıje shyqpasa prokýratýraǵa aryz túsirý kerek ekenin aıtady.  Al dúkendi tekserý zańdy ekenin jetkizdi. 

Shymkent qalasy Qarataý aýdandyq ishki ister basqarmasyna habarlasyp edik, Qarataý aýdandyq İİB basshysy Nurǵalı Seltanov esimdi kezekshi polıseı arqyly atalǵan jaǵdaıǵa qatysty komentarı bermeıtinin jetkizdi. Basqarma basshysy bizben tikeleı baılanysqa shyqpady.