Jyr basy Ońtaıly sátiń túspegen, Jazatyn tolǵap jyrym eń. Tat baspas sen bir mys shege, Tolǵantyp kelgen pirim eń. Aıqasyp jaýmen kórýge, Joryqqa shyqqan Sherýbaı. Erkindik úshin ólimge, Basyńdy tikken erim-aı! Jaraldyq neden sor qabaq, Kıeli babam Sherýbaı. Aıtylmaı kelgen qorǵalap, Aqtardym ishki sherimdi-aı. Aǵyzyp qandy terińdi, Qaıratyńdy alyp zorladyń. Saryarqa syndy jerińdi, Kózińdeı kórip qorǵadyń. Taǵdyryń aıdap jiberdi, Táýeldi bolmaq munsha kim. Namysqa qaırap jigerdi, Peıishke batyl jumsadyń. Jaýjúrek týǵan óziń de, Jaralǵan ediń eldikke. Qastandyq qalaı kezinde, Jolyqqan jomart erlikke?... Kóńiline jurttyń toq bolǵan, Qasıetti ańǵal erim-aı. Jazymyshqa osal tap bolǵan, Qapyda ólgen jeriń-aı. Qarakelerdiń áýletin, Sebebsiz jaýdyń qorlaǵan. Rýly el, jer dáýletin, Sherýbaı ediń qorǵaǵan. Iesi ozyq aqyldyń, Jolyqqan janǵa joldas eń. Óıtpeseń Qarake batyrdyń, Nemere uly bolmas eń. Ákesi de alyp Baıboldy, Jaralǵan abzal sanadan. Týylmas ediń Aıshadaı, Ajarly arý anadan. Qaısarlyǵyńa jan buqqan, Ata mańyzdy tekti ediń. Shyrqymdy buzyp sondyqtan, Oıyma ornap ketpediń. 1. Suǵanaqtaǵan sýmańdap, Jońǵarlar ámir taptyrmaı. Aranyn ashyp qumańdap, Jaýlady kirpik qaqtyrmaı. Qasydy aýzyn jaranyń, Kórmegen ediń ozbyrdy. Qalmaqtar shashyp qaharyn, Elińdi beıǵam tozdyrdy. Aıaýsyz qyryp jaýyzdar, Kóshpeli qazaq qan jutty. Jalańdap qorqaý aýyzdar, Tarydaı shashyp qańǵytty. Dushpanǵa kirgen basynǵan, Jol emes namys berý jaı. Besaspap qarý asynǵan, Attandy batyr Sherýbaı! Tilenip kelip joryqqa, Kórsetken ózi erligin. Atysqan jaýmen toryqpaı, Baǵalamaıdy erdi kim. Qankeshti bolǵan kúresin, Jankeshtilermen bólisip. Óziniń qosty úlesin, Berisken sertke kelisip. Qanjyǵaly Bógenbaı, Qasyna baýlyp ertip ed. Qarakereı Qabanbaı, Erkelep bergen esim ed. Erjúrektikten batyldy, “Hasbatyr bala” atanǵan. Bógenbaıdyń alǵysyn, Qabanbaıdan bata alǵan. Ańyraqaıdyń shaıqasy, Bolmaǵan ońaı aıtarǵa. Bitirip Jońǵar aıqasyn, Eline batyr qaıtarda. Aılanyp qarap tosańsyp, Bergen soń shirkin alańdaı. Eń sońǵy sózin bosańsyp, Tapsyrdy jolda Qabanbaı. - Batyrǵa saqtyq bekemdik, Berik bol inim!, - degen-di. Qaharman bala eken dep, Erekshe qamyn jegen-di... Joryqqa baptap baýlyǵan, Qushaǵyna alyp qapsyryp. Shyǵaryp saldy aýlyna, Amanat etip tapsyryp. 2. Sherýbaıdyń da aýlynda, Bolmaǵan sirá tynyshtyq. Bermeıtin maza jaý munda, Otyrǵan kezde tynys qyp. Jońǵarlar talap arasha, Jatqanda eldi tozdyryp. Batystan qalmaq talasa, Bastapty lań qozdyryp. Keltirmek eken retin, Sherýbaıdy ańdyp oıqastap. Júrgenin olar biletin, Ańyraqaıdaǵy shaıqasta. Suǵanaq ıtshe ańdyǵan, İrgeden tyǵyp tumsyǵyn. Timiskilep qańǵyǵan, Qadady qalmaq tym suǵyn. Aılana qoryp sýmańdap, Qaıyrshylanyp torydy. Qalmady saý jer bul mańda, Jaýlardyń boldy qoryǵy. Aýyldy tektep tekserip, Túnimen kezip jortatyn. Kelip qalsa!... dep seskenip, Sherýbaıdan tek qorqatyn. Sherýbaı deseń tosynnan, Záresi qalmaı ushatyn. Kezinde jaman shoshynǵan, İship-jegenin qusatyn. Mekenin tonap arystan, Shapsa da qyryp toımady. Boljaǵan dándep alysty, Ańdyǵan dushpan qoımady. Búrkitti taýdan ótkende, Jaltaryp izin jańalap. Qaramurynǵa jetkende, Sherýbaıdy aldy qamalap. Jaralǵan susty jigermen, Talaıyn soǵyp jaıratty. Hasbatyr da ese jibermeı, Jumsady sońǵy qaıratty. Semserge basyn qaqqyzyp, Qaıtaryp keri qastyǵyn. Qaǵynǵan jaýdy jatqyzyp, Jastandyrdy jastyǵyn. Qaterli qyrsyq shaldy ma, Jalǵyzdyń kúni qaraly. Kóz jumdy jete aýlyna, Qansoqta bolyp jaraly. Bolmaǵan serik qasynda, Júrekte kekti dert toldy. Boıynda Topar, Tosynda, Sherýbaı batyr mert boldy. Órtedi aýyly ózegin, Alla bir sátin bermedi. Boıyna Nura ózenniń, Uldaryn jylap jerledi. Qaıranda qalar estigen, Qasiret ediń o, qandaı! Aýyly qaldy óksigen, Jeńistiń kúni toılanbaı. Seriksiz batyr ańǵalyn, Jiberip jaýǵa qazaǵym. Kúńirentip Nura ańǵaryn, Tynbady san jyl azaly ún. Qaıyńǵa súıep arqasyn, Kúızeldi kúırep dostaryń. Órmelep ósken Jartasyń, Joqtady ólgen asqaryn. Tentek ózeni eńirep, Kóziniń ashshy tókti ýyn. Túnergen bozań tóńirek, İrkildi aqpaı Kóksýyń. Alapat soǵyp doldanyp, Aýnatyp tasty jel urdy. Lyqsyp kólder jaldanyp, Kemerden asyp elirdi. Tasyǵan shaqta sarqyrap, Quıatyn orap uraǵa. Tolastap aqpaı arqyrap, Qaıysty toqtap Nura da. Qumadyr sýsyp qulady, Sulý-Mádıne sulady. Tassýat zámzám bulaǵy, Móldirep mólt-mólt jylady. Balyqty kóldiń suńqyldap, Aqqýy qaıtty kıeli. Buǵyly Búrkit muń tyńdap, Aq bultqa basyn súıedi. Ókinip mysal keltirdik, Ótipti ǵumyr jyraqta. Erkindik quryp, el tirlik, Urpaǵyń jetti muratqa! 3. Táýelsiz ánin shyrqadym, Baq qonbas áste erliksiz. Kóterip bıik jyr taǵyn, Basymyzdy ıip berdik biz. Qıyn da qystaý kezinde, Qasterlep arys esilin. Sherýbaı-Nura ózen dep. Tirkegen halyq esimin. Armandap jyryn aqyndar, Arnaǵan búgin órenge. Serýen quryp jatyńdar, Sherýbaı-Nura bógenge. Zamanǵa ótken kúıindik, Maqsatqa berik túıindik. Qasıetińe syıynyp, Jaratylysyńa súıindik. Jazylyp jerge esimiń, Kitapqa aıqyn qalmaǵan. Kúıretken shyndyq esigin, Ústemdik eken jalmaǵan. Qıalǵa batyp oılaǵan, Oıymdy jiktep san túngi. Terenge tartyp boılaǵan, Asyrdyq asqaq dańqyńdy. Arýaǵyńdy atap uranǵa, Aqorda kóterdik asyńa. Atyńdy túsirip Quranǵa, Qulpytas qoıdyq basyńa. Ańyz ǵyp jeli batyryn, Sherli kúı shertip tolqyndy. Júrekti terbep aqyryn, Sherýbaı atty kól tundy. Jyrladym men de asqaqtaı, Saýytty erin halyqtyń. Bógende júzgen qasqaqpaı, Qorǵaǵan bizdi balyqsyń. Qadirli jurtqa esimin, Qaldyrǵan jerge atyńdy. Sherýbaı syndy esilim, Qasterlap ótem zatyńdy. Táýelsiz bolyp ǵasyrdan, Ǵasyrǵa astyq bir beles. Saryarqa syndy dalańa, Astanam qondy irgeles. Qazaǵy, kelgen basylyp, Talpynyp ǵylym bilimge. Aıyǵyp tuman ashylyp, Sóıledi ana tilinde. Jyr sońy Elim baı, baıtaq jerim baı, Erkindik qurǵan bar ortam. Qorǵaǵan eriń Sherýbaı, Jasaı ber jasa, Saryarqam! Aınalyp toryp torlaǵan, Jaýlaryń dáıim bolmasyn. Babalar uly joldaǵan, Qasıetti arýaq qoldasyn! Jyryqtan ańsap oralǵan, Men de bir aqyn túlegiń. Halqyma qaısar jaralǵan, Bereke-birlik tiledim!

Soldathan Oraıhanuly, Qazaqstan jazýshylar odaǵynyń múshesi, aqyn