İle Alataýynyń eteginde elimizdiń 1000-nan astam palýandary «Beldesý» ulttyq kúresi boıynsha ótken alǵashqy respýblıkalyq týrnırge qatysýda. Bul olımpıadalyq emes oıyndardyń álemdik jelisine resmı túrde engen eń kóne ulttyq kúres túri.

Týrnırdi ashqan Almaty ákimi Baýyrjan Baıbek Elbasynyń «Rýhanı jańǵyrý» baǵdarlamasyn júzege asyrýda búgingi kúni ulttyq sport túrlerin damytýǵa erekshe nazar aýdarylýda ekenin aıtty.

Qazaqstandyqtar arasynda «Alaman báıge», «Qazaq kúresi», «Aýdaryspaq», «Jamby atý», «Kókpar» boıynsha jarystar keńinen tanymal bolýda.

Óz kezeginde qazaq kúresi federasıasynyń basshysy Qanat Bozymbaev «Beldesý» ulttyq kúresi jastarǵa patrıottyq tárbıe berýmen qatar elimizdiń jańa chempıondaryn ashýy múmkin ekenin aıtty. Attary ańyzǵa aınalǵan Qajymuqan, Balýan Sholaq syndy palýandar osyndaı saıystarǵa qatysqan edi.

«Halyq barysy» jobasynyń ıdeıalyq qoldaýshysy Arman Shoraev týrnırge nıet bildirgenderdiń barlyǵy, sonyń ishinde 18-den 50 jasqa deıingi sheteldik sportshylar da qatysa alady dedi. Jarystyń aldynda barlyq sportshylyr medısınalyq baqylaýdan ótedi.

«Árbir jekpe-jek 5 mınýtqa sozylady. Eger palýannyń bireýi jerge qulasa nemese tizesimen, qolymen, denesiniń ózge bóligimen jerge tirelse, jeńilgen bolyp sanalady. Esep teń bolsa, onda 3 mınýt qosymsha ýaqyt beriledi. Budan keıin de jeńimpaz anyqtalmasa, onda qatysýshylar salmaq ólsheýden ótedi. Jeńis salmaǵy eń tómen sportshyǵa beriledi», - dedi Arman Shoraev.

«Halyq barysy» týrnıriniń ashylý saltanaty barysynda kórermender aldynda «MýzArtLIFE», Qaırat Nurtas, «Órken», «Boztorǵaı» balalar hory, Marjan Arapbaeva, Ushqyn Jamalbek, Nurbolat Abdýllın, Ábdijappar Álqoja, Mádına Sádýaqasova, QR UQK shekara ýchılıshesiniń kýrsanttary jáne basqalary óner kórsetti.