Jeńis kúni qarsańynda qala turǵyndary men qonaqtaryn mazmundy merekelik baǵdarlamalar kútýde.

7 mamyrda saǵat 10-00-de Respýblıka Saraıy aldyndaǵy Abaı alańynda Qazaqstan Respýblıkasynyń Qarýly Kúshteri qataryna shaqyrylǵandarǵa qatysty saltanatty shara ótedi. Shara barysynda barlaý bólimshesi desant-shabýyl áskerleriniń kórsetilimi men QR Memlekettik úrlmeli aspaptar orkestriniń merekelik konserti bolady.

Otan qorǵaýshy kúni merekesi aıasynda sahnada otandyq estrada juldyzdary, sonyń ishinde Nurqat Súıinbek, Erbolat Qudaıbergenov, Monique, Aıjan Nurmaǵambetova jáne basqalary óner kórsetedi.

Saǵat 11-00-de megapolıstiń barlyq vıdeobordtarynda «Otar» áskerı bazasyndaǵy Qazaqstan Respýblıkasy Qarýly Kúshteriniń Jaýyngerlik sherýinen tikeleı translásıa uıymdastyrylady.

Dál osy kúni saǵat 22-00-de Saıran ózeni jaǵasynda merekelik salút bolady.

«Uly dala oıyndary» merekelik festıvali aıasynda megapolıste birqatar sporttyq – buqaralyq sharalar josparlanǵan.

7 mamyrda saǵat 10-00-de qalalyq ıpodromda at sportynyń ulttyq túrlerinen jarystar ótedi.

8 mamyrda saǵat 19-00-de Qazaqstanda alǵash ret «Suńqar» sport kesheninde «Beldesý» ulttyq kúresi boıynsha «Halyq Barysy» ashyq respýblıkalyq týrnır ótedi. Bul - IýNESKO-nyń qoldaýymen olımpıadalyq emes sporttyń álemdik jelisine engen eń kóne ejelgi ulttyq kúres túri. Týrnırge elimizdiń ár óńirinen myńǵa jýyq palýan qatysady, onyń júldelik qory 20 mıllıon teńge.

9 mamyrda saǵat 11-00-de 28-shi gvardıashyl-panfılovshylar saıabaǵynda Uly Otan soǵysyndaǵy Jeńis kúninniń 73 jyldyǵyna oraı «Máńgilik alaýǵa» gúl shoqtaryn qoıý rásimi ótedi.

«Bul kúni dástúr boıynsha áskerı asqana uıymdastyrylyp, merekelik baǵdarlama usynylady. Áskerı tehnıka kórmesi, arnaıy fotoaımaq, alǵys qabyrǵasy, tiri ınstallásıalar men teatrlandyrylǵan qoıylymdar josparlanǵan. Bulardan ózge, árıne soǵys jyldarynyń súıikti ánderi oryndalady. Kez- kelgen jan oǵan qatysyp, jeńis úshin qurban bolǵandardy eske alady», - dep atap ótti Mádenıet basqarmasynyń basshysy Hanzada Esenova.

Saǵat 12-00-de «Astana» alańynan «Qaharman Ult–Bessmertnyı polk» sherýi bastalady. Sherý Tóle bı kóshesinen Dostyq dańǵylyna deıin, sodan soń Dostyq dańǵylynan Qazybek bı kóshesine deıin baryp, Zenkov kóshesinen 28-shi gvardıashyl-panfılovshylar saıabaǵyndaǵy Dańq Memorıalyna barady.

Dál osy kúni saǵat 20-00-de «Astana» alańynda qazaq estrada juldyzdarynyń qatysýymen merekelik konsert uıymdastyrylady. Elimizdiń eńbek sińirgen qaıratkeri Aleksandr Belákovtyń basshylyǵymen estradalyq-sımfonıalyq orkestrdiń oryndaýynda soǵys jyldarynyń tanymal ánderi shyrqalady.

Merekelik shara sońy saǵat 22-00-de «Astana» alańyndaǵy salútke ulasady.